ABŞ Prezidenti Donald Tramp və Ukrayna Prezidenti Volodimir Zelenski BMT Baş Assambleyasının sessiyası çərçivəsində Nyu-Yorkda görüşüblər.
Tramp danışıqlar başlamazdan əvvəl jurnalistlərə açıqlamasında Ukraynada “Patriot” raketlərinin istehsalının mümkünlüyünü Zelenski ilə müzakirə edəcəyini bildirib.
ABŞ Prezidenti Ukrayna Silahlı Qüvvələrinin Rusiyanın neft emalı zavodlarına həyata keçirdiyi hücumları da “Rusiya üçün ciddi zərbə” adlandırıb.
Trampdan Ukraynanın bütün ərazilərini geri qaytara bilib-bilməyəcəyi və sülh əldə etmək üçün ərazi güzəştlərinə getməsinin lazım olub-olmayacağı soruşulub.
“Düşünürəm ki, onlar razılaşma əldə edəcəklər. Bu razılaşmanın konkret nədən ibarət olacağını demək istəmirəm. Biz bu barədə çox danışırıq, o cümlədən Prezident Putinlə də müzakirə edirik. Düşünürəm ki, nəsə baş verəcək”, – Tramp deyib.
O, Ukrayna hərbçilərinin döyüş qabiliyyətini də yüksək qiymətləndirib:
“Onlar çox yaxşı döyüşçülərdir. Hər halda, onlarla fəxr edə bilərik. Görək nə baş verəcək. Onlar çox, çox bacarıqlı insanlardır. Çox bacarıqlı rəhbərlikləri var”.
Zelenski isə öz növbəsində müharibənin qış başlamazdan əvvəl başa çatacağına ümid etdiyini bildirib. Ukrayna Prezidenti bu prosesdə Trampın kömək edəcəyinə ümid etdiyini vurğulayıb.
Jurnalistlər üçün açıq hissə başa çatdıqdan sonra Tramp və Zelenskinin danışıqları qapalı formatda davam edib.
