İran Prezidenti Məsud Pezeşkian BMT Baş Assambleyasındakı çıxışında bildirib ki, Tehran dialoqa, diplomatiyaya və danışıqlara hazırdır, lakin güc tətbiqi hədəsi altında danışıqları qəbul etməyəcək.
O, həmçinin İranın təzyiqlərə tabe olmaq niyyətində olmadığını və ölkəni “son nəfəsinə qədər” müdafiə edəcəyini bildirib.
Pezeşkian ABŞ Prezidenti Donald Trampın bir gün əvvəl BMT Baş Assambleyasındakı çıxışına da toxunub. Onun sözlərinə görə, Trampın İranla bağlı səsləndirdiyi fikirlər BMT Nizamnaməsinin mahiyyətinə ziddir.
“İran xalqının müqaviməti sanksiyalar, təzyiqlərin artırılması və hədələmə qarşısında daha da güclənəcək. Biz heç vaxt başımızı əyməyəcəyik və diz çökməyəcəyik”, – İran prezidenti deyib.
Onun sözlərinə görə, İran ABŞ və digər tərəflərlə dialoqa hazırdır, lakin bunun üçün təhdid və məcburetmə olmamalıdır.
“İran cənab Tramp və bizi qorxutmağa çalışanlar tərəfindən başa düşülməlidir: biz dialoqa, diplomatiyaya və danışıqlara hazırıq, amma güc dilini qəbul etməyəcəyik”, – Pezeşkian bildirib.
“İran heç vaxt müharibəyə başlamayıb”
İran prezidenti ölkəsinə qarşı, onun ifadəsinə görə, təcavüz törətmiş ölkələrə müraciət edərək onların İranın təzyiqlərə qarşı dayanmaq qabiliyyətinə əmin olduqlarını bildirib.
“İran heç vaxt təcavüzkar olmayıb, heç vaxt müharibəyə başlamayıb və həmişə danışıqlara sadiqliyini nümayiş etdirib. Onlar bizə müharibə sırımağa çalışırlar, amma biz mübarizədən – müdafiə xarakterli müharibədən qorxmadığımızı sübut etdik”, – deyə Pezeşkian bildirib.
“Biz sevimli İranımızı, vətənimizi son nəfəsimizə qədər müdafiə edəcəyik”, – İran prezidenti əlavə edib.
Pezeşkian İsraili ittiham edib
İran prezidenti İsraili Tehrana münasibətdə ikili standart tətbiq etməkdə də ittiham edib.
“Nüvə silahı İsraildədir, amma müfəttişlər İrandadır. İsrail öldürür, İran isə sanksiyalara məruz qalır”, – Pezeşkian deyib.
Hörmüz boğazı ilə bağlı xəbərdarlıq
Yaxın Şərqdəki vəziyyətdən danışan Pezeşkian Hörmüz boğazı məsələsinə də toxunub.
Onun sözlərinə görə, İran bəzi ölkələrin bu su yolundan sərbəst şəkildə öz maraqları üçün istifadə etməsinə, eyni zamanda ondan İrana təzyiq göstərmək və ölkənin öz sularına çıxışını məhdudlaşdırmaq məqsədilə yararlanmasına imkan verə bilməz.
Pezeşkian hərbi əməliyyatların genişləndirilməsinin təhlükəsizliyə gətirib çıxarmayacağını bildirib.
“Fələstini nəzərə almadan sülhdən danışmaq olmaz”
İran prezidenti Fələstindəki vəziyyətin beynəlxalq ictimaiyyətin vicdanında “açıq yara” olaraq qaldığını bildirib.
Onun sözlərinə görə, bu vəziyyət beynəlxalq mexanizmlərin dinc əhalinin iztirablarının qarşısını almaqda acizliyini göstərir.
“Fələstini görməzdən gələrək sülhdən danışa bilmərik. Fələstin üçün ədalət təmin olunmadan Qərbi Asiyada davamlı sülh mümkün deyil”, – Pezeşkian bildirib.
