Süni intellekt və böyük texnologiya şirkətlərinin təsiri nəticəsində 2035-ci ilə qədər Almaniyada jurnalistlərin sayı iki dəfə azala bilər.
Azpost.info bildirir ki, bu, ARD, ZDF və Deutschlandradio-nun sifarişi ilə aparılan yeni araşdırmada Almaniya media bazarının qarşıdakı 10 ildə inkişafı üçün nəzərdə tutulan dörd mümkün ssenaridən ən bədbinidir.
Araşdırmaya görə, 2023-cü ildə Almaniyada təxminən 40 min peşəkar jurnalist fəaliyyət göstərib. Müxtəlif ssenarilərdən asılı olaraq, 2035-ci ilə qədər onların sayı 12–50 faiz azala bilər. Bundan başqa, media şirkətlərinin gəlirlərində də ciddi geriləmə baş verə bilər. Sektor qarşısında duran əsas çağırışlar süni intellekt və iri texnologiya şirkətlərinin getdikcə artan təsiridir.
Media bazarını texnologiya nəhəngləri ələ keçirə bilər
Xüsusilə “Big Tech Takeover” — “İT nəhənglərinin bazarı ələ keçirməsi” adlanan ssenari olduqca bədbin görünür. Bu proqnoza əsasən, texnologiya korporasiyaları media bazarına demək olar ki, tam nəzarət edəcək, ənənəvi media qurumları isə əsasən həmin platformalar üçün məzmun istehsal edən vasitəçilərə çevriləcəklər.
İT şirkətləri istifadəçilərin hansı xəbərləri, videoları və digər materialları görəcəyini daha çox müəyyənləşdirə biləcəklər. Qəzetlərin, televiziya kanallarının və digər ənənəvi media qurumlarının auditoriyaya birbaşa çıxışı və öz məzmunlarından gəlir əldə etməsi isə getdikcə çətinləşəcək. Bu ssenariyə əsasən, media şirkətlərinin reklamdan və məzmun satışından əldə etdiyi gəlirlər 43 faiz azala bilər. Ən əlverişli ssenaridə isə bu azalmanın təxminən 10 faiz olacağı proqnozlaşdırılır.
Hesabatın hazırlanması üçün Köln Texniki Universitetinin və Tallin Universitetinin alimləri onlarla araşdırma və hesabatı təhlil edib, həmçinin ekspertlər arasında sorğu keçiriblər.
Sunay Aydın
