ABŞ administrasiyası Konqresi məlumatlandırıb ki, Ukraynaya daha əvvəl təsdiqlənmiş 400 milyon dollarlıq hərbi yardım paketinin tam çatdırılması 2029-cu maliyyə ilindən tez başa çatmayacaq.
Bu barədə Reuters agentliyi məlumat yayıb.
Məlumata görə, Pentaqon may ayında Konqresə göndərdiyi məktubda yardımın 2029-cu maliyyə ili ərzində tam icra olunmasının planlaşdırıldığını bildirib. ABŞ-da 2029-cu maliyyə ili 2028-ci ilin oktyabrından başlayaraq 2029-cu ilin sentyabrında başa çatır.
Agentliyin yazdığına görə, Konqresin bəzi üzvləri yardımın bu qədər gec çatdırılmasını tənqid edərək narazılıqlarını ifadə ediblər. Onların fikrincə, təsdiqlənmiş vəsait Ukraynaya daha operativ şəkildə göndərilməlidir.
Məlumata əsasən, yardım paketinin 200 milyon dolları silah və sursatın alınmasına, 100 milyon dolları hərbi texnika və ehtiyat hissələrinə, 100 milyon dolları isə hərbi yüklərin daşınması xidmətlərinə sərf olunacaq.
Xatırladaq ki, ABŞ senatoru Dik Dörbin iyulun 21-də administrasiyanın Konqres tərəfindən təsdiqlənmiş 400 milyon dollarlıq yardımı Kiyevə göndərmədiyini bildirmiş və qərarın növbəti ABŞ prezidenti tərəfindən verilə biləcəyini söyləmişdi. ABŞ-ın müdafiə naziri Pit Heqset dinləmələr zamanı bu iddianı nə təsdiqləyib, nə də təkzib edib.
