Alimlər müəyyən ediblər ki, təbii çoxçiçəkli bal gələcəkdə dərinin yaşlanmasının qarşısını alan kremlərin əsas komponentlərindən birinə çevrilə bilər.
Antioxidants jurnalında dərc olunan araşdırmaya görə, zəif bal məhlulu ilə işlənmiş dəri hüceyrələri ultrabənövşəyi (UV) şüaların təsirindən sonra daha az zədələnib və özünü yeniləmə qabiliyyətini daha yaxşı qoruyub.
Tədqiqatçılar bildirirlər ki, bal hüceyrələrin antioksidant müdafiəsini gücləndirir, DNT-nin zədələnməsini azaldır və dərinin vaxtından əvvəl qocalmasına səbəb olan prosesləri ləngidir.
Araşdırma çərçivəsində insan dərisinin müxtəlif hüceyrələri laboratoriya şəraitində UV şüalarına məruz qoyulub. Bal tətbiq edilən hüceyrələrdə dərinin bərpası və gənc qalmasını təmin edən genlərin daha aktiv işlədiyi müşahidə olunub.
Alimlər vurğulayırlar ki, bu nəticələr ümidverici olsa da, bal hələlik günəşdən qoruyucu vasitə hesab edilə bilməz. Bunun üçün insan üzərində əlavə klinik tədqiqatların aparılması tələb olunur.
Mütəxəssislərin fikrincə, gələcəkdə yüksək keyfiyyətli çoxçiçəkli bal günəş şüalarının yaratdığı zədələrdən qoruyan kosmetik vasitələrin və tibbi preparatların hazırlanmasında istifadə oluna bilər.
