Almaniya
Almaniyanın Moskvadakı səfirliyi yaydığı paylaşım səbəbindən üzr istəmək məcburiyyətində qalıb. AzPost xəbər verir ki, diplomatik missiya Sovet İttifaqının bayrağını təhqir edən və müharibədən sonrakı Almaniyanın işğal zonalarını əks etdirən xəritə yayımlayıb.
Hadisə səfirliyin rəsmi Telegram kanalında baş verib. Paylaşılan xəritədə SSRİ bayrağının dizaynı təhrif olunmuş şəkildə təqdim edilib. Sözügedən təsvirdə qırmızı fonda ağ dairə və qara svastika yerləşdirilmişdi ki, bu da Hitler Almaniyasının bayrağı ilə eynilik təşkil edirdi.
Məlumatı RİA Novosti yayıb. Almaniya səfirliyi açıqlamasında bildirib: “1945-ci ildə Almaniyanın dörd işğal zonasına bölünməsi ilə bağlı paylaşımda səhv məlumat və uyğun olmayan illüstrasiya yer alıb. Üzr istəyirik”. Diplomatik missiya vurğulayıb ki, abunəçilərinin hisslərini incitmək niyyətində olmayıblar və xəritəni dərhal başqa illüstrasiya ilə əvəz ediblər.
Rusiya Xarici İşlər Nazirliyinin rəsmi nümayəndəsi Mariya Zaxarova isə olaya sərt reaksiya verib. O bəyan edib ki, Almaniyada nasizm üzərində qələbənin 80 illiyi qeyd olunan vaxt belə bir paylaşımın üzrü artıq kifayət deyil.
