Azərbaycanda fəaliyyət göstərən aparıcı sığorta şirkətlərindən biri olan “Atəşgah Sığorta” ASC və “Atəşgah Həyat Sığorta” ASC-nin xidmətindən narazı qalan vətəndaşın sosial şəbəkədəki etirazı böyük diqqət çəkib. KASKO sığorta növü üzrə ödəniş prosesində qarşılaşdığı bürokratik əngəllərdən və iddia olunan qeyri-peşəkar yanaşmadan bezən vətəndaş digər sürücüləri bu şirkətlə işləməməyə çağırıb.
AzPost.info xəbər verir ki, bu barədə Bilal Nəbiyev adlı sığortaolunan sosial şəbəkədə ətraflı şikayət mətni paylaşıb.
Gecikən qiymətləndirmə və qəfildən kəsilən 200 manat
Şikayətçi qeyd edir ki, aprel ayında baş vermiş iki fərqli avtomobil qəzası ilə bağlı müraciət etsə də, şirkət prosesi həddindən artıq uzadıb:
“17 aprel və 28 aprel tarixlərində baş vermiş avtomobil hadisələri ilə bağlı müraciət etməyimə baxmayaraq, ilkin qiymətləndirmə və təklif yalnız 1 iyun tarixində təqdim edilmişdir. Təklif olunan məbləğlə razılaşdıqdan sonra müvafiq sənədi imzaladım. Lakin bundan bir gün sonra mənə yeni sənəd təqdim edildi və həmin sənəddə əvvəlki məbləğdən 200 AZN az ödəniş nəzərdə tutuldu”.
B.Nəbiyevin sözlərinə görə, şirkət rəsmiləri bu fərqi qəza zamanı qarşı tərəfin avtomobili müəyyən edilmədiyi üçün franşiza (azadolma məbləği) tətbiq edilməsi ilə əsaslandırıblar. Sığortaolunan isə haqlı olaraq prosesin gedişatına qarşı bir neçə ciddi sual qaldırır:
“Əgər qarşı tərəfin müəyyən edilməsi və tapılması vətəndaşın üzərinə düşürsə, bu zaman KASKO sığortasının üstünlüyü və funksiyası nədən ibarətdir? Əgər azadolma tətbiq ediləcəyi əvvəlcədən məlum idisə, nə üçün ilkin qiymətləndirmə sənədində və mənimlə aparılan danışıqlarda bu barədə məlumat verilməmişdir? Müştəri imzaladığı sənəddən sonra niyə daha aşağı məbləğə məcbur edilir?”
“İstəsəniz Mərkəzi Banka şikayət edə bilərsiniz”
Şikayətçi həmçinin şirkət əməkdaşlarının peşəkar etika qaydalarını pozduğunu və müştəriyə qarşı laqeyd münasibət bəslədiyini iddia edir:
“Əməkdaşlarınız tərəfindən ‘bizim əlimizdə sizin razılıq ərizəniz var, istəsəniz Mərkəzi Banka şikayət edə bilərsiniz’ ifadəsinin işlədilməsi müştəri məmnuniyyəti və peşəkar xidmət prinsipləri ilə nə dərəcədə uyğun gəlir? Mənim imzaladığım ilk razılıq ərizəsində yekun ödəniş məbləğindən 200 AZN azadolmanın tətbiq olunacağı niyə açıq şəkildə qeyd edilməmişdir?”
Vətəndaş bütün danışıq prosesinin video və ekran görüntülərini qeydə aldığını bildirərək, sürücülərə gələcəkdə bənzər problemlərlə qarşılaşmamaq üçün digər sığorta şirkətlərinə müraciət etməyi məsləhət görüb.
“Atəşgah Sığorta”dan cavab: “Müqavilənin 4 şərti eyni vaxtda yerinə yetirilməlidir”
Məsələ ilə bağlı “Atəşgah Sığorta” rəsmi açıqlama yayaraq hadisənin sığorta müqaviləsinin şərtlərinə uyğun araşdırıldığını bildirib. Şirkətdən verilən məlumata görə, KASKO müqavilələrində franşizanın (azadolmanın) tətbiq edilməməsi üçün eyni anda 4 mütləq şərt yerinə yetirilməlidir:
-
Hadisədə sığortalı şəxs zərərçəkmiş tərəf olduqda;
-
Qəzada təqsirli bilinən zərərvuran şəxsin icbari sığortası (YSHMSİS) qüvvədə olduqda;
-
Hadisə ikidən çox olmayan avtonəqliyyat vasitəsinin iştirakı ilə baş verdikdə;
-
Avtomobilə dəymiş zərər 5 000.00 manatdan çox olmadıqda.
Şirkətin açıqlamasında vurğulanır ki, sözügedən hadisədə 2-ci bənd (yəni təqsirkar tərəfin müəyyən edilməsi və onun icbari sığorta müqaviləsinin olması) tam təmin edilmədiyi üçün hər iki hadisə üzrə 200 AZN məbləğində franşiza tətbiq olunub:
“Hadisə zamanı zərərvuran şəxsin müəyyən edilməsi və məsuliyyətinin təsdiqlənməsi müvafiq hüquq-mühafizə orqanlarının səlahiyyətlərinə daxildir. Sığorta müqaviləsi yalnız sığorta risklərini və ödəniş şərtlərini əhatə edir. Sözügedən sığorta müqaviləsini əldə edərkən müştərinin bütün şərtlərlə tanış olmaq imkanı olub və o, imzası ilə bunu təsdiqləyib. Bizim məqsədimiz müqavilə şərtlərinin düzgün tətbiq olunmasını təmin etməkdir”.
Sığorta ekspertləri qeyd edirlər ki, şirkətin hüquqi baxımdan müqavilə bəndlərinə əsaslanması qanunidir, lakin müştəriyə ilkin mərhələdə fərqli məbləğ təklif edib, sənəd imzalatdıqdan sonra məbləği azaltmaq sığorta bazarında şəffaflıq və etibar prinsiplərinə ciddi zərbə vurur. Vətəndaşın Mərkəzi Banka yönləndirilməsi forması isə müştəri yönümlü biznes strategiyasına ziddir.
