İsti
Avropada iyun ayında baş verən güclü istilər nəticəsində 2300 nəfər həyatını itirib. Yeni araşdırmanın nəticələri iqlim dəyişikliyinin insan sağlamlığına real və təhlükəli təsirini bir daha təsdiqləyib.
Tədqiqatçılar bildiriblər ki, iyunun 23-dən iyulun 2-dək davam edən ekstremal istilər Avropanın 12 iri şəhərində ölüm hallarını ciddi şəkildə artırıb. AzPost xəbər verir ki, The Guardian nəşrinin yaydığı məlumata görə, qeyd olunan ölümlərin ən azı 1500-ü planetdə baş verən iqlim böhranı ilə bilavasitə əlaqələndirilib.
Ekspertlərin hesablamalarına əsasən, ən ağır vəziyyət Milanda qeydə alınıb. Burada 499 nəfər istilərdən həyatını itirib və onların 317-si məhz iqlim dəyişikliyinin təsirindən ölüb. Paris, Barselona və London da ən çox itki verən şəhərlər arasında yer alıb. Məsələn, Londonda 273 ölüm hadisəsindən 171-i insanın iqlimə təsiri ilə bağlı olub.
London Gigiyena və Tropik Tibb Məktəbinin epidemioloqu, araşdırmanın həmmüəllifi Malkolm Mistri bu barədə açıqlama verərək deyib: “Bu tədqiqat ekstremal istilərin səssiz qatillər adlandırılmasının səbəbini açıq şəkildə göstərir. Təəssüf ki, İspaniya, Fransa və İtaliyada indidən yüzlərlə ölüm hadisəsi qeydə alınsa da, gələcəkdə bu rəqəmin minlərlə olacağı proqnozlaşdırılır”.
Qeyd edək ki, World Weather Attribution qrupunun ilkin təhlilinə görə, qeyd edilən ölüm hallarının təxminən üçdə ikisi birbaşa iqlim dəyişikliyi ilə bağlıdır. Ekspertlər bildirirlər ki, qlobal istiləşmənin qarşısı alınmazsa, belə faciəvi statistika daha da pisləşəcək.
