Müasir dövrün çağırışlarına uyğun olaraq “Azərsu” ASC-də işə qəbul üçün müraciətlərin elektron qaydada qəbuluna başlanılıb. Bu məqsədlə “www.azersu.az” rəsmi internet səhifəsində “Karyera” bölməsi
ASC-dən bildirilib ki, işə qəbul üçün müraciət etmək istəyənlər Cəmiyyətin rəsmi internet səhifəsinə daxil olub “Karyera” bölməsində “CV müraciət” və “Vakansiya” bölmələrindən birini seçərək şəxsiyyət vəsiqəsi üzrə Fərdi İdentifikasiya Nömrəsi (FİN) və adına olan mobil telefon nömrəsini yazmaqla qeydiyyatdan keçə bilərlər. “CV müraciət” bölməsi vasitəsilə olunan müraciətlər kadr ehtiyat bazasına daxil edilir.
“Vakansiya” bölməsində isə konkret vakant iş yerləri göstərilir və vətəndaşlar həmin vəzifə haqqında məlumat əldə etdikdən sonra bu bölmədən çıxmadan müraciət edə bilərlər.
Hər iki halda hazır elektron müraciət forması yaranır. Portal Daxili İşlər Nazirliyinin sisteminə inteqrasiya edildiyindən müraciət edənin şəxsi məlumatları həmin formada görünür. Boş qalan, xüsusilə ulduz işarəsi ilə fərqləndirilən xanalar müraciət edən şəxs tərəfindən doldurulur. İşə qəbul olmaq istəyənlər təhsil, iş təcrübəsi və təltifləri barədə məlumatları daxil edirlər.
“Azərsu” ASC-nin insan resursları siyasətinin prioritetlərindən olan obyektivliyin və şəffaflığın təmin olunması nəzərə alınaraq işə qəbul 4 mərhələdə – elektron müraciət, bilik yoxlaması (test), müsahibə və əmək münasibətlərinin rəsmiləşdirilməsi ilə həyata keçirilir.
Müsahibədən keçən şəxslər vakant yer olduqda müvafiq vəzifəyə təyin edilir. Vakant yer olmadıqda isə kadr ehtiyat bazasına daxil edilir və gələcəkdə ixtisasına, peşəsinə uyğun vakant yer olduqda onunla əlaqə saxlanılaraq dəvət olunur.
Qeyd edək ki, müraciət edənlərdən yalnız vakansiya üzrə tələblərə cavab verən namizədlər bilik yoxlanmasına cəlb olunurlar.
