BMT baş katibi Trampa Qəzzaya görə xəbərdarlıq edib.
BMT baş katibi Antonio Quterreş ABŞ prezidenti Donald Trampı Qəzzada “etnik təmizləmə” planından çəkinməyə çağırıb.
AzPost “Reuters”a istinadən xəbər verir.
Xatırladaq ki, prezident Tramp fevralın 4-də İsrail baş naziri Netanyahu ilə Ağ evdə keçirdiyi birgə mətbuat konfransı zamanı qəzzalıların köçürülməsini və Qəzzaya ABŞ-nin nəzarət etməsini təklif edib.
“Həll yolları axtararkən problemi daha da ağırlaşdırmamalıyıq. Beynəlxalq hüququn əsaslarına sadiq qalmaq çox vacibdir. Hər hansı bir etnik təmizləmə formasından qaçmaq vacibdir”, – Quterreş BMT komitəsinin iclasında bildirib. “Biz “iki dövlətli” həlli təsdiq etməliyik”, – o əlavə edib.
Quterreş çıxışında Trampa Qəzzaya görə xəbərdarlıq edərək bildirib ki, dayanıqlı sülh “iki dövlətli” həllə doğru əhəmiyyətli, geri dönüşü olmayan və qalıcı irəliləyiş tələb edir. O deyib ki, bu sülh yolu işğalın sona çatmasını və müstəqil Fələstin dövlətinin yaradılmasını, Qəzzanın isə bu dövlətin ayrılmaz bir hissəsi kimi qəbul olunmasını təmin etməlidir.
BMT iki dövlətin – İsrail və Fələstinin təhlükəsiz və tanınmış sərhədlər daxilində yan-yana yaşamasını dəstəkləyir.
Xatırladaq ki, Demokrat konqresmen Al Qrin deyib ki, Trampın “Qəzzanı ələ keçirmək” təklifi etnik təmizləməyə bərabər olan “alçaq hərəkət”dir. AzPost xəbər verir ki, siyasətçi ABŞ Nümayəndələr Palatasında bildirib ki, Amerika dövlət başçısına qarşı “Qəzzanı ələ keçirmək” təklifinə görə impiçment ittihamları irəli sürür.
The Guardian yazır ki, Texas nümayəndəsi Al Qrin Trampın planını etnik təmizləməyə bərabər olan “alçaq hərəkət” adlandırıb.
Bu addım demokratların yeni inauqurasiya edilmiş Tramp administrasiyasına və onun bir çoxlarının çevriliş kimi qiymətləndirdiyi xaotik hakimiyyəti ələ keçirmə siyasətinə qarşı müqaviməti gücləndirdiyi bir vaxta təsadüf edir.
Facebook-da izləyin 
“TikTok”da izləyin 
Telegramda izləyin! 
İnstagramda izləyin!
