“Fikirləşirəm ki, bu bəla hamı üçün gəlib və bundan qaçmağa heç kəsin imkanı yoxdur. Ancaq bir şey var ki, bu bəladan necə xilas olmalıyıq. Təkcə xəstəlik yox, onun psixoloji tərəfi məni daha çox maraqlandırır”.
Bunu açıqlamasında yazıçı Əkrəm Əylisli koronavirus pandemiyası haqda danışarkən deyib.
Yazıçı qarşıda böyük təhlükələrin olacağına görə narahatlıq keçirdiyini bildirib:
“Karantin rejiminə görə mən də evdəyəm, çünki evdə qalmağa öyrəşmiş adamam. Fikirləşirəm ki, bu bəla hamı üçün gəlib və bundan qaçmağa heç kəsin imkanı yoxdur. Ancaq bir şey var ki, bu bəladan necə xilas olmalıyıq. Təkcə xəstəlik yox, onun psixoloji tərəfi məni daha çox maraqlandırır.
Bəziləri deyir ki, adamlar evdə oturub kitab oxusunlar. Mən bilirəm ki, Azərbaycanda minlərlə ailələr var ki, evlərində dərslikdən başqa kitab yoxdur. Eyni zamanda, hələ kitab oxumaq həvəsini bir tərəfə qoyuram. Bu, dili isti yerdən çıxanlar adamlara cürbəcür məsləhətlər verir, amma mənə elə gəlir ki, elementar, sadə şeylərdən danışmaq lazımdır. Məsələn, ailələrdəki münaqişələrin dərinləşməməsi üçün hər iki tərəf çalışmalıdır ki, uşaqlar əxlaqı və beyni zədələnməsin. Uşaqlar çox həssas olur, evdə qalan uşaq valideynlərinin münasibətinin pis olduğunu müşahidə edəndə ömrü boyu bunu unuda bilmir. Bütün bunları nəzərə almaq lazımdır.
Mənə elə gəlir ki, koronavirusdan sonrakı dövr daha da çətin ola bilər. İqtisadi vəziyyət insanları çıxılmaz vəziyyətə salar. Çörək hər şeyin başındadır, Allah göstərməsin, çörəyə həddindən çox ehtiyac ola bilər və dünyanı çörəksizlik fəlakəti bürüyər.
Mənə elə gəlir ki, son dövrlər insanların həddən ziyadə azğınlaşmağı nəinki Allahın, heç bizim də xoşumuza gəlmirdi. İnsanlarda yaratmaq yox, yaradandan mənfəət əldə etmək həvəsi daha çox oyanmışdı. Bir vaxt Yuqoslaviyanı bombaladılar və nə qədər insanın harayı göyə qalxdı. Bundan sonra yalançı bəhanələrlə İraqı məhv etdilər və orada da milyon insanın naləsi göyə qalxdı. İndinin özündə Suriyada milyonların naləsi göyə qalxıb. Bu naləni Allah eşidib əvəzində bizə bir cəza verməliydi.
Siyasətçilərin fikri o idi ki, ancaq kişiləri kişilərlə evləndirsinlər. Yəni bu əməlləri ilə insanlar Allahın əleyhinə getdilər. Məndə olan əsas qorxu ondan ibarətdir ki, insanların ruh dünyası dağılmasın, çünki insan onsuz yaşaya bilməz. Bir sözlə, mənim üçün bu fəlakət hardasa gözlənilən idi”. (moderator.az)
