Bir çox insan cücərmiş sarımsağı təhlükəli hesab edərək dərhal tullayır. Lakin mütəxəssislər bildirirlər ki, yaşıl zoğ çıxarması məhsulun zəhərli olması demək deyil.
Vaxt keçdikcə və ya yüksək rütubət, istilik və işıq təsirində sarımsaq yeni pöhrə verə bilər. Dişin içindən görünən yaşıl hissə əslində bitkinin ilkin gövdəsidir. Bu, daha çox uzun müddət saxlanmanın göstəricisidir, keyfiyyətin tam itməsi deyil.
Araşdırmalara görə, əgər sarımsağın dişləri hələ də bərkdirsə, üzərində kif, selikli qat və ya xoşagəlməz qoxu yoxdursa, onu istifadə etmək təhlükəsizdir. Cücərmə sarımsağı toksik etmir. Hətta bəzi elmi mənbələrdə qeyd olunur ki, cücərmiş sarımsaqda müəyyən antioksidant birləşmələrin miqdarı arta bilər.
Bununla belə, dad baxımından fərq hiss oluna bilər. Yaşıl zoğ hissəsi daha acı və kəskin dada malik olur. Xüsusilə çiy şəkildə – salat souslarında və ya pestoda – bu acılıq daha çox sezilir. Bişirilmiş yeməklərdə isə dad fərqi adətən zəifləyir.
Dad sizi narahat edirsə, sadəcə yaşıl zoğu çıxarmaq kifayətdir. Ancaq sarımsaq həddindən artıq acıdırsa, teksturası yumşalıbsa və ya kəskin turş, çürük qoxu verirsə, onu atmaq daha təhlükəsizdir.
Aşağıdakı hallarda sarımsağı istifadə etmək olmaz:
-
Dişlərin üzərində kif və ya tüklü örtük varsa
-
Yumşaq, selikli və ya sıyıqvari hala düşübsə
-
Kəskin turş və ya çürümüş qoxu gəlirsə
Belə hallarda məhsul bakteriya və ya kiflə çirklənmiş ola bilər və qida zəhərlənməsi riski yaradır.
Cücərmənin qarşısını almaq üçün sarımsağı sərin, quru və qaranlıq, yaxşı havalandırılan yerdə saxlamaq tövsiyə olunur. Bütöv başlar otaq temperaturunda saxlanmalıdır. Hermetik bağlanan plastik qablar rütubəti artıraraq həm cücərməni, həm də kif əmələ gəlməsini sürətləndirə bilər. Soyuducu isə əksinə, rütubətə görə cücərməni tezləşdirə bilər.
Soyulmuş və ya doğranmış sarımsaq isə mütləq soyuducuda saxlanmalı və qısa müddətdə istifadə olunmalıdır. Daha uzun müddət üçün dondurmaq mümkündür.
Mütəxəssislər vurğulayır ki, cücərmiş sarımsaq avtomatik olaraq təhlükəli sayılmamalıdır. Əsas meyar məhsulun xarab olub-olmamasıdır.
