Dəriyə qulluq
Qış aylarında aşağı temperatur, külək və isitmə sistemlərinin yaratdığı quru hava dərinin vəziyyətinə ciddi təsir göstərir. AzPost bildirir ki, dermatoloq YAO “Medisina” klinikasının mütəxəssisi Yelena Şuxman soyuq mövsümdə dərinin qorunması üçün əsas tövsiyələri açıqlayıb.
Mütəxəssisin sözlərinə görə, quru dəriyə sahib olanlar üçün əsas tərkib hissələri keramidlər, hialuron turşusu, skvalan və doymamış yağlardır. Bu maddələr dərinin lipid baryerini bərpa edir və nəmin qorunmasına kömək edir. Keramidlər bütün dəri tipləri üçün uyğun hesab olunur, hialuron turşusu xüsusilə həssas və yaşlanan dəri üçün faydalıdır, şi və jojoba kimi yağlar isə quru və normal dəriyə daha çox tövsiyə edilir.
Dermatoloq qış aylarında SPF qoruyucularından istifadənin də vacibliyini vurğulayıb. Onun sözlərinə görə, ultrabənövşəyi şüalar qardan əks olunaraq təsirini artırır və bu, hətta mənfi temperaturda belə dəridə zədələnmələrə səbəb ola bilər.
Əllər və dodaqlar qışda xüsusi qulluq tələb edir. Pantenol, E vitamini və mum tərkibli sıx balzamların hər su ilə təmasdan sonra və açıq havaya çıxmazdan əvvəl çəkilməsi məsləhət görülür. Aqressiv skrabların istifadəsi isə bu dövrdə risklidir, çünki zəifləyən dəri baryerini daha da zədələyə bilər. Bunun əvəzinə fermentli və ya süd əsaslı pilinqlərdən həftədə 1–2 dəfə istifadə etmək tövsiyə olunur.
Şuxman qeyd edib ki, quru hava, sintetik geyimlər və güclü təmizləyici vasitələr dəridə qıcıqlanmanı artırır. Bu səbəbdən evdə hava nəmləndiricilərindən istifadə, təbii parçalara üstünlük verilməsi və hipoallergen vasitələrin seçilməsi məqsədəuyğundur. Hamam və sauna da dərini quruda bilər, buna görə bu prosedurlardan sonra mütləq nəmləndirici krem çəkilməlidir.
Mütəxəssis davamlı qızartı, ağrılı çatlar, irinli səpgilər və ev şəraitində keçməyən qabıqlanma hallarında mütləq dermatoloqa müraciət etməyi tövsiyə edib.
