Tender
Azərbaycanda dövlət qurumları tərəfindən son günlərdə həyata keçirilən tenderlər yenidən diqqət mərkəzinə düşüb. AzPost -un əldə etdiyi məlumata görə, müxtəlif dövlət qurumları avtomobil, İT avadanlıqları və xidmətləri üçün ümumilikdə 814 min manatlıq müqavilə bağlayıb. Maraqlısı isə odur ki, bu tenderlərin bəziləri dövlət satınalmalarının vahid internet portalında keçirilməyib.
Məlumata əsasən, Fövqəladə Hallar Nazirliyinin tabeliyində olan “Azərdövlətsənayelayihə” Dövlət Layihə İnstitutu nəqliyyat vasitələrinin alınması üçün 136 min manat sərf edəcək. Qurum bu məqsədlə “Azərmaş Park” MMC ilə artıq müqavilə imzalayıb.
Bundan əlavə, Kənd Təsərrüfatı Nazirliyinin tabeliyindəki “Aqrar Tədarük və Təchizat” ASC də tender keçirib. Şirkət “Toyota Camry 2.5 I Hybrid” markalı avtomobilin alınması üçün 78 min manat ödəyəcək. Maraqlı məqam ondadır ki, bu satınalma proseduru dövlət satınalmalarının vahid internet portalında keçirilməyib və birbaşa müqavilə əsasında “Toyota Bakı Mərkəzi” MMC ilə bağlanıb.
Daha iri məbləğ isə Azərbaycan Respublikasının Səfərbərlik və Hərbi Xidmətə Çağırış üzrə Dövlət Xidməti tərəfindən xərclənəcək. Belə ki, qurum informasiya-kommunikasiya avadanlığı, kəsilməz enerji ehtiyatı sistemi, şəbəkə infrastrukturuna texniki xidmət və proqram təminatının təkmilləşdirilməsi üçün 600 min manat ayırıb. Sözügedən layihəni isə “BestComp Group” QSC həyata keçirəcək.
Qeyd edək ki, şirkətin fövqəladə hallar naziri Kəmaləddin Heydərovla əlaqəli olduğu barədə mətbuatda iddialar var. Həmçinin bu tender də dövlət satınalmaları portalı üzərindən elan edilmədən bağlanıb.
