Azərişıq
Son günlər sosial şəbəkələrdə “Azərişıq” ASC-yə qarşı şikayətlərin sayı artmaqdadır. AzPost xəbər verir ki, bir çox vətəndaş şirkətin sayğac göstəricilərini düzgün hesablamaq əvəzinə, süni şəkildə artıraraq abonentlərə göndərdiyini iddia edir.
Sosial şəbəkə istifadəçilərindən biri bildirib ki, on üç ildir yaşadığı evdə aylıq elektrik xərcləri yay-qış otuz–otuz beş manat arasında dəyişib. Lakin avqust ayı üçün gözlənilmədən əlli manatlıq borc göndərilib. Onun sözlərinə görə, iyun ayında on altı, iyulda isə iyirmi manatlıq istifadə qeydə alınıb, üstəlik avqustda on gün evdə heç kim olmayıb. Buna baxmayaraq, ödəniş əvvəlki aylardan iki dəfə artıq göstərilib.
Oxşar şikayətlər digər vətəndaşlar tərəfindən də səsləndirilib. İstifadəçilər qeyd edir ki, bu, artıq fərdi hal deyil, kütləvi narazılığa çevrilib.
Məsələ ilə bağlı “Azərişıq” ASC hələlik ictimaiyyətə rəsmi açıqlama verməyib.
