Məktəbli
Uşaqların yaxşı qiymət alması üçün onlara pul vermək düzgün motivasiya üsulu hesab edilmir. AzPost xəbər verir ki, bu barədə “Aksion Təhsil” ekspertlərindən biri, psixologiya üzrə fəlsəfə doktoru Aleksandra Fokina açıqlama verib.
Mütəxəssisin sözlərinə görə, valideynlərin belə addımı daha çox öz narahatlıqlarını sakitləşdirmək məqsədi daşıyır, nəinki uşağın təhsil keyfiyyətinə müsbət təsir göstərir. “Elə bir məbləğ yoxdur ki, maraqsız və zəif biliklərə malik şagirdi yaxşı oxuyan məktəbli etsin. Bu üsul uşağın motivasiyasını deyil, valideynin iç rahatlığını təmin edir”, – deyə psixoloq vurğulayıb.
Fokinanın fikrincə, uşağın dərslərdə marağını artırmağın ən düzgün yolu onunla ünsiyyətdə olmaqdır. Valideynlər övladlarına dərslər, müəllimlərlə münasibətləri və sinifdəki ab-hava barədə suallar verməklə, onların daxili motivasiyasını daha yaxşı anlaya bilərlər.
Ekspert əlavə edib ki, bilik pulla alınmır, yalnız diplom almaq mümkündür. Ona görə də uşaqları qiymətə görə deyil, göstərdikləri səy, münasibət və əldə etdikləri nəticələrə görə mükafatlandırmaq daha sağlam yanaşmadır.
