sığorta olunanların sayı
2025-ci ilin ilk altı ayı ərzində Azərbaycanda fəaliyyət göstərən bəzi sığorta şirkətləri üzrə müştəri şikayətlərinin artması müşahidə olunur. AzPost Mərkəzi Bankın dərc etdiyi “Şikayət İndeksi” statistikası əsasında bildirir ki, “PAŞA Sığorta” və “Atəşgah Sığorta” şirkətləri ən yüksək şikayət göstəricilərinə malik olan şirkətlər kimi qeyd olunub. Belə ki, “PAŞA Sığorta” 1.30 göstərici ilə, “Atəşgah Sığorta” isə 1.15 indekslə “qırmızı zona” adlandırılan riskli xidmət kateqoriyasına düşüb. Bu rəqəmlər şirkətlərin xidmətlərindən narazılıq səviyyəsinin yüksək olduğunu göstərir.
Bundan əvvəl – 2024-cü ilin sonlarında “Xalq Sığorta” da yüksək şikayət göstəricisi (1.35) ilə diqqət çəkmişdi. 2025-ci ilin əvvəllərində bu indeks müəyyən qədər azalsa da, şirkətə qarşı ictimai narazılıq davam edir.
Mərkəzi Bank bu indeksləri əsasən icbari avtomobil sığortası üzrə müştəri müraciətləri, şikayətlər və onların həll müddətləri əsasında hesablayır. İndeksin “1”dən yuxarı olması artıq sığorta şirkətinin xidmət keyfiyyətində ciddi problemlərin olduğunu göstərir.
Əksinə, “Qala Sığorta” və “Mega Sığorta” kimi şirkətlər 0.39–0.41 arasında dəyişən indekslərlə “yaşıl zona”da qərarlaşıb.
Ekspertlər qeyd edir ki, sığorta sektorunda şikayətlərin əsas səbəbləri ödənişlərin gecikdirilməsi, qeyri-şəffaf şərtlər və müştəri ilə düzgün kommunikasiya qurulmamasıdır. Xüsusilə avtomobil qəzası, daşınmaz əmlak və tibbi sığorta hallarında gecikmiş ödənişlər geniş narazılıqlara yol açır.
Sığorta müqaviləsi bağlayan vətəndaşlara tövsiyə olunur ki, şirkət seçərkən rəsmi göstəriciləri və əvvəlki müştəri rəylərini diqqətlə nəzərdən keçirsinlər. Mərkəzi Bankın ictimai hesabatları, bu baxımdan, önəmli istinad mənbəyidir.
