Böyük Britaniyada 16 il ərzində eyni vaxtda iki yerdə çalışan qadın işdən azad olunub. Hadisə ilə bağlı məlumatı Daily Mail yayıb.
AzPost xəbər verir ki, məlumata görə, Muliqat Ogumodede adlı qadın 2008–2024-cü illərdə gündüz saatlarında Deutsche Bank-da, gecə isə Böyük Britaniya parlamentində təmizlikçi işləyib. O, iş qrafikini gizlətmək üçün müxtəlif klininq şirkətlərindən istifadə edərək hər iki iş yerini aldatmağa nail olub.
Qadın beş gün ərzində səhər 08:00-dan axşam 17:00-dək bankda, gecə isə saat 22:00-dan səhər 06:00-dək parlamentdə çalışıb. Bu, onun gündəlik 17 saata qədər işləməsi demək idi.
Lakin uzunmüddətli gizli fəaliyyət üzə çıxandan sonra qadın parlamentdəki işindən qovulub. O, qərarı məhkəmədə mübahisələndirməyə çalışsa da, bütün iddiaları rədd olunub.
Hakim qərarında bildirib ki, belə ağır iş qrafiki həm qadının sağlamlığına, həm də iş keyfiyyətinə mənfi təsir göstərə bilər. Qeyd olunub ki, yorğun işçilər çox vaxt ciddi səhvlərə yol verirlər ki, bu da həm iş prosesinə, həm də rəhbərliyə zərər vurur.
