Gürcüstanın Avropa İttifaqına qoşulma prosesi dayandırılıb

Gürcüstanın Avropa İttifaqına qoşulma prosesi Tbilisinin bugünlərdə qəbul etdiyi “xarici agent” qanununa görə dayandırılıb.

Azpost.info bildirir ki, bu barədə Avropa İttifaqının Gürcüstandakı səfiri açıqlama verib.

Gürcüstanın Interpress news agentliyinin məlumatına görə, Aİ səfiri Pavel Herçinski bildirib ki, sözü gedən qanunun qəbulu Gürcüstanın bloka qoşulmaq perspektivlərinə mənfi təsir göstərib və bu proses hazırda faktiki olaraq dayandırılıb: “Prinsip etibarilə bu qanunun qəbulu Gürcüstanın Avropa İttifaqına inteqrasiyasını dondurub”.

ABŞ , Avropa İttifaqı və Britaniya qanunu tənqid edərək Tbilisiyə xəbərdarlıq ediblər ki, onun qəbulu Gürcüstanın Aİ-nin tam üzvlüyünə sahiblənməsi prosesini dayandıracaq.

Gürcüstana Aİ üzvlüyünə namizəd statusu ötən ilin dekabrında verilib. Lakin Aİ rəsmiləri xəbərdarlıq ediblər ki, Tbilisi bloka qoşulmaq üçün zəruri olan bir sıra islahatlarda geri çəkilib.

Interpress Herçinskiyə istinadla bildirib ki, Avropa İttifaqı ölkələrinin xarici işlər nazirləri Gürcüstanın namizədlik statusu məsələsini gələn həftə Lüksemburqda keçiriləcək iclaslarında müzakirə edəcəklər.

Aİ səfiri deyib ki, Gürcüstanla münasibətdə artıq bir neçə növbəti addımlar müəyyənləşdirilib və iclasda bu tədbirlərdən hansının tətbiq olunacağına dair qərar qəbul olunacaq.

Əvvəlki məqalə

Ərdoğan Baydenlə nə vaxt görüşəcək?

Sonrakı məqalə

Putinlə Ərdoğan Astana görüşündə nələri müzakirə edəcəklər?