Hindistan qəza
Hindistanda baş verən təyyarə qəzası ilə bağlı sensasion məlumatlar ortaya çıxıb. AzPost xəbər verir ki, qəza Əhmədabad şəhərində yerləşən Sardar Vallabhbhai Patel Beynəlxalq Hava Limanı yaxınlığında qeydə alınıb.
Reuters agentliyinin məlumatına görə, qəzaya uğrayan sərnişin təyyarəsi Britaniyanın Birmingem şəhərinə istiqamətlənibmiş. Məlumata əsasən, hava gəmisinin Boeing 787 markalı və Air India aviaşirkətinə məxsus olduğu təsdiqlənib.
Times of India nəşri qeyd edir ki, təyyarə havaya qalxdıqdan bir neçə saniyə sonra nasazlıq səbəbindən yerə çırpılıb. Bildirilir ki, təyyarə uçuş öncəsi kifayət qədər yanacaqla təmin edilib, bu da qəza zamanı baş verən güclü partlayış və yanğının səbəbini izah edir.
Bundan əlavə, Flightradar24 platformasının məlumatına görə, AI171 saylı reys Əhmədabaddan Londona istiqamət götürüb. Qəza uçuşun start götürdüyü andan demək olar ki, dərhal baş verib.
İlkin ehtimallara görə, göyərtədə 242 sərnişin və ekipaj üzvü olub.
Hazırda qəzanın dəqiq səbəbləri araşdırılır və hadisə yerində xilasetmə işləri davam etdirilir. Rəsmi qurumlar tərəfindən verilən açıqlamaya görə, qəzanın nəticələri və insan tələfatı barədə dəqiq məlumatlar yaxın saatlarda paylaşılacaq.
