Skiripka
İkinci Dünya Müharibəsinin sonlarında itkin düşmüş nadir Stradivarius skripkası Yaponiyanın paytaxtı Tokioda aşkar edilib.
AzPost xəbər verir ki, “The New York Times”ın yazdığına görə, məşhur italyan ustası Antonio Stradivarinin düzəltdiyi bu musiqi aləti uzun illər sonra tədqiqatçı Karla Şapronun araşdırmaları nəticəsində tanınıb.
Skripka “Mendelssohn (1709)” adı ilə tanınsa da, Tokioda keçirilən sərgidə üzərində 1707-ci il istehsal tarixi və “Stella” adı ilə təqdim olunub. Lakin musiqi aləti üzərindəki cızıqlar, aşınmalar və bükülmələr onu tanımaq üçün kifayət edib. Tarisio hərrac evinin mütəxəssisləri bu xüsusiyyətlərin skripkanın əsl kimliyini təsdiqlədiyini bildiriblər.
Paris Musiqi Muzeyinin kuratoru Jan-Filipp Eşar skripkanın orijinallığını təsdiqləyərək bildirib ki, onu saxtalaşdırmaq nəzəri cəhətdən mümkün olsa da, alətin yaşı və texniki detalları onun əsl Stradivarius olduğunu sübut edir.
Bu nadir alət 2000-ci ildə Nyu-Yorkda “Tarisio” hərracında “Stella” adı ilə 1,2–1,5 milyon dollar arasında qiymətə satılıb. Həmin vaxt onun əsl kimliyi müəyyən edilməmişdi. İndi isə Tarisio hərrac evinin təsisçisi Ceyson Prays bu skripkanın əslində “Mendelssohn” modeli olduğunu təsdiqləyib.
Antonio Stradivari tərəfindən hazırlanmış təxminən 650 musiqi aləti bu günə qədər qorunub saxlanılıb ki, onlardan təqribən 450-si skripkadır. Usta öz ilk skripkasını 1666-cı ildə, sonuncusunu isə 1736-cı ildə hazırlamışdı.
