Instaqramda trend
Sosial media dünyasında uğur qazanmaq və diqqət çəkmək getdikcə çətinləşir. Azpost.az xəbər verir ki, xüsusilə Instaqram platformasında istifadəçilərin böyük əksəriyyəti daha çox izləyici və bəyənmə əldə etməyin yollarını axtarır. Əslində isə bir çoxunun bilmədiyi bəzi sadə, lakin effektli üsullar var ki, bu hiylələrlə paylaşımlarınız daha çox izlənilə və trend ola bilər.
Əvvəlcə qeyd edək ki, Instaqram algoritmi paylaşımların ilk 30-60 dəqiqə içində aldığı reaksiyaya əsasən həmin postu irəli çıxarır. Mütəxəssislər bildirir ki, paylaşım etməzdən əvvəl aktiv saatları müəyyənləşdirmək və izləyicilərin ən çox onlayn olduğu vaxtlarda post etmək, görüntülənmə sayını xeyli artırır. Bunun üçün tətbiqin statistik bölməsindən izləyicilərin aktivlik saatlarını öyrənmək mümkündür.
Digər təsirli üsullardan biri isə “Close Friends” siyahısından istifadə etməkdir. Çoxları bu funksiyanı yalnız şəxsi paylaşımlar üçün bilsə də, əslində burada eksklüziv məzmun və endirim xəbərləri paylaşmaqla izləyicilərin marağını saxlamaq olar. Bu üsulla siz izləyici kütləsini fərqli kontentlə cəlb edərək, paylaşımlarınızın daha çox diqqət çəkməsinə nail ola bilərsiniz.
Bundan əlavə, paylaşıma əlavə olunan mətnlərin ilk 2 sətiri çox önəmlidir. Çünki istifadəçilər əsasən həmin hissəni oxuyur və maraqlı olduğu halda davamını izləyir. Ona görə də, diqqətçəkici başlıq və sual formasında statuslar daha çox baxış və reaksiya gətirir.
İnstagram Reels və Story bölmələrindən aktiv istifadə etmək də izləyici sayını artıran əsas amillərdəndir. Ən son trend musiqilər və effektlərdən istifadə etməklə video paylaşımlarınızın kəşf bölməsində çıxma ehtimalı yüksəlir. Hətta son dövrdə çox az bilinən “Alt Text” funksiyası ilə şəkillərinizə SEO uyğun təsvirlər yazmaqla daha geniş auditoriyaya çatmaq mümkündür.
Mütəxəssislər onu da bildirir ki, çox vaxt istifadəçilər yanlış heşteqlərdən istifadə edir. Həddindən artıq ümumi və populyar etiketlər əksinə, paylaşımlarınızı itirə bilər. Bunun əvəzinə orta səviyyədə məşhur və daha spesifik heşteqlər seçmək daha doğru hesab olunur.
