İnsult
İnsultdan qorunmaq üçün hansı profilaktik tədbirlərin faydalı olduğu açıqlanıb. AzPost xəbər verir ki, Rusiya Dövlət Təhsil Universitetinin Tibb Fakültəsinin Cərrahiyyə kafedrasının müəllimi Aleksandr Umnov bu barədə “Lenta.ru”ya müsahibəsində danışıb.
Cərrah qeyd edib ki, insult, əslində, “damar fəlakəti” hesab olunur və bu vəziyyətdən yayınmaq üçün müəyyən profilaktik qaydalara əməl etmək vacibdir. Onun sözlərinə görə, əsas risk faktorları sırasına yüksək qan təzyiqi, xolesterin səviyyəsinin artması, şəkərli diabet və piylənmə daxildir.
Mütəxəssis gündə iki dəfə qan təzyiqinin yoxlanılmasını məsləhət görüb. Xüsusən, gənclərdə təzyiq göstəriciləri 140/80 mm civə sütununu keçirsə, dərhal kardioloqa müraciət etmək tövsiyə olunur. Umnov hamilə qadınların da insult riski altında olduğunu vurğulayıb.
Piylənmə və oturaq həyat tərzi də insult riskini artıran amillərdən sayılır. Həkim bildirib ki, xüsusilə evdən işləyənlər və passiv həyat tərzi keçirənlər fiziki aktivliyə daha çox vaxt ayırmalı, gün ərzində qısa piyada gəzintilər və sadə idman hərəkətləri etməlidir. Bu, baş beyinə qan axınının normallaşması üçün vacib hesab olunur.
Umnov qeyd edib ki, alkoqol və siqaret də insult üçün təhlükə mənbəyidir. Eyni zamanda, nəzarətsiz şəkərli diabet xəstələrinin qan damarlarında və sinir sistemində yaranan zədələnmələr bu riskin daha da artmasına səbəb olur.
Cərrah bildirib ki, insult riski yüksək olan şəxslər həyat tərzlərini dəyişməli, zərərli vərdişlərdən uzaq durmalı və sağlam qidalanmaya üstünlük verməlidirlər.
Qeyd edək ki, insult beyin damarlarının tutulması və ya partlaması nəticəsində baş verir və vaxtında müdaxilə edilməzsə, ağır fəsadlar yarada bilər. Profilaktik qaydalara əməl etməklə bu təhlükənin qarşısını almaq mümkündür.
