İPhone
“Apple” payızın əsas hadisəsinə – yeni “iPhone”ların təqdimatına hazırlaşır.
Valyuta.az xəbər verir ki, “Bloomberg”dən Mark Qurmanın son məlumatları doğru olarsa, tədbir 9 və ya 10 sentyabrda baş tutacaq.
Bildiyiniz kimi, “Apple” adətən ABŞ-da Əmək Günündən sonrakı həftədə sentyabr təqdimatlarını keçirir, həmin tarix bu il sentyabrın 1-nə təsadüf edir. Bu, 8-dən 12-yə kimi ikinci həftəni ideal vaxt edir. “Apple” həmçinin cümə günlərindən (bu il 12 sentyabrdır), eləcə də 11 sentyabrın ildönümündən qaçır.
Yeni “iPhone”ların təqdimatına həsr olunmuş son on tədbirdən beşi çərşənbə axşamı, üçü isə çərşənbə günü baş tutub. Beləliklə, 9 sentyabr çərşənbə axşamı və ya 10 sentyabr çərşənbə günü ən çox ehtimal olunan variantlar kimi görünür.
“Apple”ın bu il smartfon çeşidi dəyişəcək: dörd model gözlənilir, lakin Plus versiyasının əvəzinə Air və ya Slim versiyası (dəqiq adı hələ məlum deyil) olacaq. Bu, şirkətin ən nazik smartfonu olacaq.
“iPhone 17” xətti ilə yanaşı, şirkət həm də yeni ağıllı saatların və “iPad Pro M5″in bütün xəttini nümayiş etdirəcək. Bundan əlavə, inkişaf etmiş sağlamlıq xüsusiyyətlərinə malik “AirPods Pro 3” üzərində iş aparıldığı barədə şayiələr var. İnsayderlərin fikrincə, “Apple” bu payızda ən azı 15 yeni qurğu təqdim edəcək.
“iPhone 17” smartfonları ilə eyni vaxtda iOS 26 yeni “şüşə” dizaynda buraxılacaq. Şirkət bu yeniləməni son 11 ilin ən böyük yeniləməsi adlandırır.
2026-cı ilin baharı da “Apple” cihazlarında çox zəngin olacağını vəd edir. Yeni büdcəli “iPhone 17e”ni, M5 prosessorlu ilk “MacBook”ları və əsas “iPad” və “Air”də yeniləmələri gözləməyə dəyər.
