Evlilik
ABŞ-da qadın keçmiş sevgilisi ilə onun xəbəri olmadan nikah bağladığı üçün həbs olunub. AzPost xəbər verir ki, Texas ştatında yaşayan 36 yaşlı Kristin Mari Spirman, şəxsi əlaqələrini sui-istifadə edərək bəyin iştirakı olmadan nikahın rəsmiləşdirilməsinə nail olub.
İstintaqın məlumatına görə, qadın hələ münasibətlərinin davam etdiyi dövrdə, 2025-ci il iyunun 2-də əldə edilmiş nikah vəsiqəsindən istifadə edərək gizli şəkildə nikah sənədlərini təqdim edib. O, keşişi bəyin iştirakı olmadan nikah bağlamağa razı salıb. Beləliklə, nikah hüquqi cəhətdən qüvvəyə minib.
Ən diqqətçəkən məqam isə bəyi bu evlilikdən yalnız poçtla aldığı nikah şəhadətnaməsi vasitəsilə xəbərdar olmasıdır. O, sənədi oxuduqdan sonra dərhal hüquq-mühafizə orqanlarına müraciət edib. Hadisə ilə bağlı WGN TV telekanalı ətraflı məlumat yayıb.
Hazırda Kristin Mari Spirman təqib və saxta nikah təşkil etmək ittihamı ilə həbs edilib. Qanunvericiliyə əsasən, bu cinayətə görə onu on ilə qədər azadlıqdan məhrumetmə cəzası gözləyir.
Polis hadisədə iştirak edən və nikahı icra edən keşişin kimliyini hələlik açıqlamayıb. Hüquq-mühafizə orqanları araşdırmanı davam etdirir.
