“Bakı Metropoliteni” QSC tərəfindən xətlərin ayrılması layihəsi çəçivəsində “28 May” və “Nizami” stansiyaları arasında birbaşa metro əlaqəsinin olmaması səbəbindən yaranacaq çətinliklər nəzərə alınaraq, yerüstü nəqliyyatda əlavə dəstəkləyici tədbirlərin təşkilinə dair qərar qəbul olunub.
AYNA-dan bildirilib ki, qurum tərəfindən əlavə ekspres xətlərin yaradılması və mövcud xətlərin gücləndirilməsi ilə bağlı tədbirlər görülməsi nəzərdə tutulur. Layihənin icrasına başlanıldığı vaxtdan etibarən müxtəlif istiqamətlərdə 6 yeni ekspres avtobus marşrutu istifadəyə veriləcək və bir sıra mövcud marşrut xətlərindəki nəqliyyat vasitələrinin sayı artırılacaq.
Avtobusların hərəkəti metronun iş rejiminə uyğunlaşdırılaraq saat 06:00-dan 00:00-dək davam edəcək.
Yeni ekspres xətləri bunlardır:
M1 – Metronun “Elmlər Akademiyası” və “28 May” stansiyaları arasında
M2 – Metronun “İnşaatçılar”, “Nizami” və “28 May” stansiyaları arasında
M3 – Metronun “20 Yanvar”, “Nizami” və “28 May” stansiyaları arasında
M4 – Metronun “20 Yanvar” və “Koroğlu” stansiyaları arasında
M5 – Metronun “20 Yanvar” və “Gənclik” stansiyaları arasında
M6 – Metronun “Elmlər Akademiyası” və “Gənclik” stansiyaları arasında
Əlavə olaraq 2, 6, 7A, 9, 10, 14, 17, 18, 26, 61, 65, 79, 85, 88, 88A, 93, 133, 165,199, 202 nömrəli marşrutlarda avtobusların sayı artırılacaq və intervalı aşağı salınacaq. Metronun bağlanması müddəti ərzində əlavə tələbat yaranacaq marşrutlarda avtobus sayının artırılması nəzərdə tutulur.
Sərnişinlər alternativ marşrutlar barədə məlumatı “AYNA MaaS” tətbiqi vasitəsilə də əldə edə bilərlər.
Layihənin icra müddətində metronun “28 May”, “20 Yanvar”, “İnşaatçılar” və “Elmlər Akademiyası” stansiyalarının qarşısında könüllülər sərnişinlərə dəstək göstərəcəklər.
Ətraflı videomaterialda: https://www.youtube.com/watch?v=VOPC6mGYGlQ
“Bakı Metropoliteni” QSC-nin mətbuat katibi Bəxtiyar Məmmədov bildirib ki, avqustun 15-dən “Nizami” və “28 May” stansiyaları arasında fəaliyyət göstərəcək əlavə avtobuslar ödənişli olacaq.
AYNA-dan bildirilib ki, gediş haqqı 60 qəpik olacaq.
