“Moskvada Heydər Əliyevə heykəl qoyulsun” –

Haqq-Ədalət Partiyasının sədri, sabiq səhiyyə naziri Əli İnsanov Moskvada ümummilli lider Heydər Əliyevə heykəl qoyulmasını təklif edib. 

Azpost.info bildirir ki, HƏP sədri bu barədə prezident İlham Əliyevin Rusiyaya səfərinin nəticələri ilə bağlı şərhində vurğulayıb.

Ə.İnsanovun sözlərinə görə, H.Əliyev SSRİ-nin dövlət rəhbərlərindən biri olarkən, həm də Rusiya Federasiyasının inkişafında, iqtisadi cəhətdən güclənməsində tarixi rolu olub.

“Sovet İttifaqı Kommunist Partiyası Siyasi Bürosunun üzvü və SSR-i Nazirlər Soveti sədrinin birinci müavini vəzifələrində çalışmış, bu gün də böyük rus xalqı tərəfindən dərin hörmət və ehtiramla yad edilən, zamanəmizin böyük dövlət xadimi Heydər Əliyevin Moskva şəhərində heykəlinin ucaldılması, onun əziz xatirəsinin əbədiləşdirilməsi, tarixi həqiqətlərə verilmiş dəqiq və yüksək qiymət olardı”-deyə Ə.İnsanov bildirib.

Ə.İnsanov qeyd edib ki, 2022-ci il fevralın 22-də Moskvada Azərbaycan və Rusiya Prezidentləri tərəfindən imzalanan ‘’Azərbaycan Respublikası ilə Rusiya Federasiyası arasında Müttəfiqlik qarşılıqlı fəaliyyəti haqqında’’ Bəyannamə xalqlarımız arasında tarixi dostluq və mehriban qonşuluq ənənələrinə, dərin mədəni və humanitar əlaqələrə əsaslanaraq, dövlətlərarası münasibətlərimizi keyfiyyətçə yeni-müttəfiqlik səviyyəsinə qaldırıb. Ölkələrimiz arasında yüksək səviyyəli qarşılıqlı səfərlər, 260 sənədi əhatə edən genişhüquqlü baza və mütəmadi qaydada keçirilən iqtisadi forum və konfranslar ikitərəfli münasibətlərin inkişafında həlledici rol oynayır.