İtaliyanın şimalında dramatik hadisələr yaşanır. Naməlum şəxslərdən ibarət qrup bank filiallarından birinə daxil olaraq orada olan insanları girov götürüb.
AzPost xəbər verir ki, hadisə Milanın mərkəzi rayonlarından birində baş verib. Silahlı şəxslər bank binasına daxil olaraq hədə-qorxu gəlməyə başlayıblar. Hazırda binada neçə nəfərin olduğu və cinayətkarların konkret tələbləri barədə dəqiq məlumat yoxdur.
Hadisə yerinə dərhal polis və xüsusi təyinatlı qüvvələr cəlb olunub. Ərazi tamamilə mühasirəyə alınıb, yaxınlıqdakı küçələrdə hərəkət məhdudlaşdırılıb. Hüquq-mühafizə orqanları cinayətkarlarla danışıqlara başlamağa çalışır.
Şahidlərin sözlərinə görə, ərazidə güclü təhlükəsizlik tədbirləri görülüb, hadisə yerinə təcili tibbi yardım briqadaları da gəlib. Hakimiyyət orqanları vətəndaşları həmin rayondan uzaq durmağa çağırıb. Hazırda əməliyyat davam edir.
