İsrailin Baş naziri Benyamin Netanyahu ABŞ Prezidenti Donald Trampla qarşıdakı görüşü ərəfəsində Təhlükəsizlik Kabinetindən Qəzza zolağında Beynəlxalq Sabitləşdirmə Qüvvələrinin (ISF) yerləşdirilməsinə razılıq almağa çalışıb.
Azpost.info bildirir ki, bu barədə İsrailin 12-ci kanalı məlumat yayıb.
Məlumata görə, Ağ Ev əvvəlcə Netanyahu ilə görüşün keçirilməsinə xüsusi maraq göstərməyib və diplomatik kanallar vasitəsilə İsrail hökumətinin başçısına Vaşinqtona konkret diplomatik nəticə ilə gəlməsinin məqsədəuyğun olduğu mesajını çatdırıb.
Bildirilib ki, Netanyahu ABŞ-dəki İsrail səfiri Yexiel Leyter və Trampa yaxın müşavirlərlə məsləhətləşmələrdən sonra Qəzza məsələsini əsas diplomatik uğur kimi təqdim etmək qərarına gəlib.
Bundan sonra baş nazir Qəzza ilə bağlı plan çərçivəsində Beynəlxalq Sabitləşdirmə Qüvvələrinin ilk mərhələdə bölgəyə yerləşdirilməsi məsələsini Təhlükəsizlik Kabinetinin müzakirəsinə çıxarıb. Qeyd olunur ki, bu addım HƏMAS silahlıları hələ tərksilah edilmədiyi halda təklif edilib.
Müzakirələrdən məlumatlı olan israilli rəsmilərdən birinin sözlərinə görə, Netanyahu bu qərarın qəbulunda israr edib və bunu Donald Trampa ünvanlanmış “jest” kimi qiymətləndirib. Mənbənin iddiasına görə, bu addım kabinetin daha əvvəl müəyyən etdiyi prinsipdən geri çəkilmək demək idi. Həmin prinsipə əsasən, beynəlxalq qüvvələr yalnız HƏMAS tam tərksilah edildikdən sonra Qəzzaya yerləşdirilə bilərdi.
Məlumatda qeyd olunur ki, Benyamin Netanyahu Ağ Evdə Donald Trampla görüşə hazırlaşır. Hərçənd iki lider ictimaiyyət qarşısında sıx əməkdaşlıq nümayiş etdirsə də, xüsusilə İran məsələsində onların mövqeləri tam üst-üstə düşmür.
