“Yeni Vergi Məcəlləsinin qəbul edilməsi çox vacibdir.Vergi Məcəlləsinə tez-tez dəyişikliklər xarici investorları çəkindirir“.
AzPost bildirir ki, bu sözləri Milli Məclisin deputatı Əli Məsimli İqtisadi siyasət, sənaye və sahibkarlıq komitəsinin bu gün keçirilən iclasında deyib.
Deputat qeyd edib ki, Vergi Məcəlləsinin qəbul edildiyi vaxtdan 25 ildən çox vaxt keçir.Həmin müddət ərzində bu Məcəlləyə onun maddələrindən qat-qat artıq sayda dəyişiklik edilib. Məcəlləyə dəyişikliklər etmək əvəzinə yeni Vergi Məcəlləsinin qəbul edilməsi daha məqbul variantdir.
Əli Məsimli bildirib ki, orta müddətə hər il kənd təsərrüfatına 500 milyon manat yönəldilib, ondan səmərəli istifadə etməklə, 5-6 ildən sonra 12 əsas məhsul növü üzrə 5-7%-ə qədər artıma nail olmaq olar: “Neçə illərdir hər il kənd təsərrüfatına yönəldilən vəsait həmin məbləği üstələyib, amma xeylı vaxtdır hər il orta hesabla 3 faiz ətrafında artım olub. Bu ilin 8 ayının göstəricilərinə görə isə kənd təsrrüfatında 1 faizə yaxın enmə müşahidə olunub. Bu fakt aqrar sahədə islahatlar kontekstində kənd təsərrüfatına diqqətin artırılmasını, bu sahənin tənzimlənməsinin hüquqi bazasının təkmilləşdirilməsini tələb edir“.
Deputat həmçinin quraqlığın təbii fəlakətlər sırasına daxil edilməsini təklif edib. Onun fikrincə, bu, fermerlərin məruz qaldığı maliyyə itkilərinin aradan qaldırılmasına real şərait yarada bilər.
Deputat bildirib ki, son vaxtlar ölkəmizdə iqtisadi artım templərinin səviyyəsi xeyli aşağı düşüb. Onun sözlərinə görə, əgər ötən ilin səkkiz ayında əvvəlki ilin müvafiq dövrü ilə müqayisədə ÜDM 4 faizdən çox artmışdısa bu il cəmi 1 faiz artım olub. Heft hasilatının aşağı düşməsi həmin sahənin maliyyə və digər göstəricilərini pisləşdirməklə yanaşı, həm də ölkəmizin ümumi artım tempinə də mənfi təsir göstərir.
“Neft sahəsindəki azalmalarla bağlı olan hissəsi məlum… Bəs qeyri -neft sektorunun ÜDM-də artım tempi niyə bu qədər aşağı düşüb? Əgər 2024-cü ilin 8 ayında 2023-cü ilin müvafiq dövrü ilə müqatisədə qeyri neft-qaz ÜDM-i 7 faiz artmışdısa, bu ilin müvafiq dövründə bu artım 2,6 faiz təşkil edib”- deyə deputat vurğulayıb.
Ə.Məsimli bildirib ki, sənayedə də buna oxşaq vəziyyətdir. Keçən ilin avqustuna qeyri neft-qaz sənayesi 8 faizə yaxın artmışdısa, bu ilin müvafiq dövründə bu artım 4,8 faiz təşkil edib. Deputat aidiyyatı qurumların iştirakı ilə dinləmənin keçirilməsini vacib hesab edib.
AzPost
