Azərbaycan siqareti
Azərbaycanda siqaret bazarında növbəti qiymət artımı ehtimal olunur.
Yayılan məlumatlara görə, yaxın günlərdə siqaretlərin pərakəndə satış qiymətlərində təxminən 20-30 qəpik civarında artım müşahidə oluna bilər.
Məlumata əsasən, gözlənilən bahalaşma ilə əlaqədar bəzi mağaza və köşklər siqaret məhsullarının yeni partiyalarını qəbul etməkdə tələsmir. Bu isə ayrı-ayrı satış məntəqələrində müəyyən markalar üzrə qısa müddətli çatışmazlıqlara səbəb ola bilər.
İqtisadçı Natiq Cəfərli mövzu ilə bağlı “Cebheinfo.az saytına bildirib ki, Azərbaycanda siqaret qiymətlərinin artması əsasən vergi və aksiz dərəcələrinin yüksəlməsi ilə bağlıdır.
Onun sözlərinə görə, bu tip məhsullar sosial baxımdan həssas kateqoriyaya aid olmadığı üçün dövlət tərəfindən vergilərin artırılması daha asan tətbiq olunur və bu, bir çox ölkələrdə müşahidə edilən tendensiyadır.
İqtisadçı qeyd edib ki, yaxın dövrdə yeni vergi və aksiz artımları siqaretin satış qiymətlərinə birbaşa təsir göstərə bilər.
Natiq Cəfərli həmçinin vurğulayıb ki, qiymət artımı müəyyən həddə qədər siqaretdən imtinanı təşviq edə bilər, lakin kəskin bahalaşma qonşu ölkələrlə qiymət fərqini artıraraq qaçaqmalçılıq riskini də yüksəldə bilər.
Onun fikrincə, bu sahədə balansın qorunması vacibdir.
