Məhkəmə
Britaniyada poçt proqramındakı kod səhvi 13 nəfərin intiharı ilə əlaqələndirilir. AzPost bildirir ki, Böyük Britaniyada baş vermiş poçt şöbəsi qalmaqalı ədalət sistemində ciddi etimad böhranına səbəb olub. Rəsmi araşdırmalara görə, ən azı on üç nəfərin intiharı bu qalmaqalla birbaşa və ya dolayı şəkildə əlaqələndirilir. Daha əlli doqquz nəfərin isə eyni səbəbdən həyatına son qoymağı planlaşdırdığı bildirilir.
Qalmaqal 1990-cı illərin sonları və 2000-ci illərin əvvəllərində Post Office tərəfindən istifadə olunan “Horizon” adlı Yapon istehsalı proqram təminatının kod səhvləri ilə başlayıb. Bu səhvlər nəticəsində təxminən iyirmi min poçt meneceri maliyyə pozuntularında haqsız yerə ittiham olunub. Onlardan öz vəsaitləri hesabına “çatışmayan pulları” geri qaytarmaları tələb olunub.
London Ali Məhkəməsi sonradan bildirib ki, poçt operatorunun rəhbərliyi bu texniki xətalardan xəbərdar olub, lakin illərlə saxta borclar adı altında işçilərdən vəsait yığmağa davam edib. Ümumilikdə, doqquz yüzə yaxın əməkdaş dələduzluq ittihamı ilə cinayət məsuliyyətinə cəlb olunub.
Hadisələrə dair araşdırmalara rəhbərlik edən hakim Vin Uilyams bildirib ki, proqram təminatı ilə intiharlar arasında birbaşa səbəb-nəticə əlaqəsi qurmaq çətin olsa da, bu ehtimal real və əsaslıdır. Onun sözlərinə görə, intihar edənlərin sayı açıqlanan rəqəmlərdən də çox ola bilər.
