Polşa parlamentində “Şimal axını” qaz kəmərlərinin partladılması işi ilə bağlı mübahisə güclü siyasi qalmaqala səbəb olub. AzPost xəbər verir ki, RİA Novosti-nin məlumatına görə, söhbət bu diversiyada iştirak etməkdə şübhəli bilinən Ukrayna vətəndaşı Vladimir Juravlyovun mümkün ekstradisiyası məsələsindən gedir.
Məsələ Sejm-in məhkəmə komissiyasının 2026-cı il üçün maliyyə planının müzakirəsi zamanı gündəmə gəlib. Lakin adi büdcə iclası gözlənilmədən siyasi qarşıdurmaya çevrilib. “Hüquq və Ədalət” partiyasının deputatı Pavel Yablonski çıxışı zamanı müzakirələrin təcili dayandırılmasını tələb edib.
Deputat bildirib ki, ertəsi gün müdafiə komitəsində yeni qanun təşəbbüsü müzakirə olunacaq. Bu sənəd, dövlət qaydalarını pozaraq Ukraynanın silahlı birləşmələrinə qoşulan polşalıların cinayət məsuliyyətindən azad edilməsini nəzərdə tutur. Yablonski hesab edir ki, həmin iclas Juravlyovun Almaniyaya verilməsinin qarşısını almaqla bağlı müzakirələrə təsir edə bilər.
Komissiya sədri əvvəlcə qısa fasilə elan edib, daha sonra Yablonskinin iclasın bağlanması barədə rəsmi təklifini səsverməyə çıxarıb. Nəticədə 15 deputat “lehinə”, 13 “əleyhinə” səs verib, 9 nəfər isə bitərəf qalıb. Beləliklə, iclas rəsmi şəkildə dayandırılıb.
Maraqlıdır ki, zaldakı müstəqil deputat Tomaş Zimox səsvermədə iştirak edə bilməyib. O, buna səbəb olaraq ona bülleten verilmədiyini deyib. Bundan sonra komissiya sədrinin ona qarşı sərt ifadələr işlətdiyi eşidilib. Hadisədən sonra sədr rəsmi üzrxahlıq edib və belə hallar təkrarlanmayacağına söz verib.
“Şimal axını” hadisəsi Polşada təkcə hüquqi deyil, həm də siyasi müstəvidə gərginlik yaratmaqda davam edir.
