Sovet və rus siyasətçisi Viktor Alksnis 74 yaşında vəfat edib.
AzPost xəbər verir ki, bu barədə Alksnisin rəhbərlik etdiyi “Qara polkovnik” teleqram kanalında onun qızı İrinaya istinadən məlumat verilib.
O, dekabrın 30-na keçən gecə insult keçirib və komaya düşüb.
Viktor Alksnis – aviasiya polkovniki, SSRİ xalq deputatı, Latviya Ali Sovetinin, eləcə də Rusiya Dövlət Dumasının deputatı olub, Sovet İttifaqının dağılmasının əleyhinə çıxıb və Dövlət Komitəsini dəstəkləyib.
O, 2000-2007-ci illərdə Dövlət Dumasının deputatı olub, 2013-2015-ci illərdə Moskva vilayətinin Tuçkovo şəhər qəsəbəsinə rəhbərlik edib. 1989-1991-ci illərdə SSRİ xalq deputatı, Latviya SSR Ali Sovetinin deputatı olub. O, Sovet İttifaqının dağılmasının əleyhdarı kimi şöhrət qazanıb, 1991-ci ilin avqustunda SSRİ prezidenti Mixail Qorbaçovun siyasətinə qarşı çıxan Fövqəladə Hallar üzrə Dövlət Komitəsini (QKÇP) dəstəkləyib. Alksnis mediada “Qara polkovnik” ləqəbini alıb.
Alksnis 1950-ci ildə Kemerovo vilayətində anadan olub, Qırmızı Ordu Hərbi Hava Qüvvələrinin rəisi Yakov Alksnisin nəvəsi olub. “Arqumenty Nedeli”yə müsahibə verən Alksnis babasının 1938-ci ildə güllələndiyini, nənəsinin isə düşərgəyə göndərildiyini bildirib.
1956-cı ildə ailəsi Riqaya köçüb. Alksnis Riqa Ali Hərbi Mühəndislik Aviasiya Məktəbini hərbi elektronika mühəndisi, eləcə də Sosial Elmlər Universitetini bitirib . 1979-1992-ci illərdə Baltik Hərbi Dairəsinin Hərbi Hava Qüvvələrinin baş mühəndisi, inspektoru vəzifələrində çalışıb.
1992-ci ilin oktyabrında Alksnis Latviyadan Rusiyaya qayıdıb və ona qarşı “dövlətə xəyanət” maddəsi ilə “Latviyanın SSRİ-dən ayrılmasına qarşı yönəlmiş deputatlıq və siyasi fəaliyyətə” görə cinayət işi açılıb. O vaxtdan Latviyada persona non-qrata olub. 2005-ci ildə o, Sevastopolda keçirilən mitinqdə Krımın Rusiyanın tərkibinə daxil edilməli olduğunu bildirdikdən sonra Ukraynaya girişi qadağan edilib.
2022-ci ilin fevralında Alksnis Ukraynada hərbi əməliyyatların başlamasını dəstəkləyib.
Azpost.info
