Krım körpüsünün partladılmasına cavab olaraq Rusiya Ukraynanın iki ən böyük liman şəhəri – Nikolayev və Odessaya raketlər və kamikadze PUA-larla zərbələr endirib.
Azpost.info xəbər verir ki, bu barədə “Zerkalo Nedeli” məlumat yayıb.
İyulun 18-nə keçən gecə iki şəhərin hakimiyyət orqanları sakinlərə hava hücumu xəbərdarlığı ilə bağlı demək olar ki, hər saat xəbərdarlıq edib.
Nikolaev administrasiyasının rəhbəri Vitali Kim bildirib ki, şəhərə hücumlar nəticəsində yanğın baş verib.
“Mash”ın məlumatına görə, yanğın limanın yaxınlığındakı neft anbarının ərazisində baş verib.
Odessa üzərində səmada da partlayış səsləri eşidilib. Əvvəlcə şəhərə pilotsuz təyyarələr hücum edib, onlardan ən azı altısı vurulub. Daha sonra hakimiyyət raket hücumu ilə bağlı xəbərdarlıq edib. Odessaya azı altı “Kalibr” qanadlı raketi atılıb. Səhər saatlarında Ukrayna ordusunun “Cənub” əməliyyat komandanlığı onların vurulduğunu açıqlayıb. Buna baxmayaraq, şəhərdə güclü partlayışlar eşidilib.
“Təəssüf ki, raket zərbələri nəticəsində liman infrastrukturu obyektlərinə və bir neçə fərdi evə ziyan dəyib. Yaşlı kişi öz evində yaralanıb, o, xəstəxanaya yerləşdirilib”, – Ukrayna Silahlı Qüvvələri bildirib.
Komandanlıq həmçinin bildirib ki, 21 “Shahed” dronu Odessa vilayətində, daha dördü isə Nikolayev vilayətində dənizdən yaxınlaşarkən vurulub. Dronlardan biri Nikolaevdəki sənaye obyektinə düşüb.
Odessa və Nikolaev Ukraynanın nəzarəti altında olan ən böyük liman şəhərləridir. Kiyev Moskva, Ankara və BMT-nin iştirak etdiyi “taxıl sazişi” əsasında bu şəhərlərdən taxıl ixrac edirdi.
Azpost.info
