Müasir dövrdə demək olar ki, hər kəs stress ilə qarşılaşır. Lakin çox az adam bu halın beyin fəaliyyətinə necə təsir etdiyindən xəbərdardır. AzPost xəbər verir ki, alimlər stress anında beyində baş verən 4 əsas prosesi açıqlayıb.
Birinci proses — “amigdala”nın hiperaktivləşməsidir. Bu beyin bölgəsi qorxu və təhlükə siqnallarını qəbul edir. Stress zamanı amigdala daha aktiv işləyərək, bədənə “təhlükə var” siqnalı göndərir və bu hal insanın diqqətini yalnız problemə yönəldir.
İkinci proses — kortizol hormonunun kəskin yüksəlməsidir. Kortizol stress hormonu hesab edilir və onun normadan artıq ifrazı yaddaş zəifliyi, diqqət pozuntusu və əhval dəyişikliyinə səbəb olur.
Üçüncü gizli proses — hipokampusun fəaliyyəti zəifləyir. Hipokampus yaddaş və məlumat emalı funksiyasını yerinə yetirir. Stress zamanı bu bölgənin aktivliyi azalır, nəticədə insan gündəlik hadisələri daha çətin yadda saxlayır və qərarvermədə çətinlik çəkir.
Dördüncü proses isə prefrontal korteksin funksiyasının müvəqqəti bloklanmasıdır. Beynin bu hissəsi məntiqi düşüncə, problem həll etmə və emosional tənzimləməyə cavabdehdir. Stress anında bu hissə zəiflədiyi üçün insan daha emosional və qeyri-məntiqli qərarlar verə bilir.
Mütəxəssislər bildirir ki, uzunmüddətli stress bu beyin bölgələrinin strukturunu da dəyişə bilər. Bu səbəbdən stresslə mübarizə üsullarını öyrənmək və gündəlik rahatlama texnikalarından istifadə etmək sağlamlıq üçün vacib hesab olunur.
