Suriya ABŞ-la davam edən danışıqlar çərçivəsində Rusiyadan neft idxalını əhəmiyyətli dərəcədə azaltmağa razılıq verib. Bu addım ölkənin 1979-cu ildən daxil olduğu ABŞ-ın “terrorizmi dəstəkləyən dövlətlər” siyahısından çıxarılması istiqamətində aparılan müzakirələrlə əlaqələndirilir.
Azpost.info xəbər verir ki, bu barədə Reuters agentliyi danışıqların gedişindən məlumatlı üç mənbəyə istinadən məlumat yayıb.
Məlumata görə, Suriya hakimiyyəti son aylarda Vaşinqtona Rusiyadan neft alışını azaltmağa hazır olduğunu bildirib. Bununla belə, mənbələr vurğulayıblar ki, ABŞ bu addımı sanksiyaların ləğvi üçün rəsmi şərt kimi irəli sürməyib.
Bununla yanaşı, ABŞ rəsmiləri Dəməşqə bildiriblər ki, Rusiya neftindən imtina ölkənin terrorizmi dəstəkləyən dövlətlər siyahısından daha sürətli çıxarılması şansını artıracaq.
Suriya tərəfi isə cavab olaraq qeyd edib ki, sanksiya statusunun ləğvi ölkəyə enerji təchizatını şaxələndirmək və alternativ neft mənbələri tapmaq imkanı yaradacaq. Hazırda ölkə alternativlərin azlığı səbəbindən böyük ölçüdə Rusiya neftindən asılı vəziyyətdədir.
Reuters-in hesablamalarına görə, 2026-cı ildə Rusiyanın Suriyaya neft tədarükü təxminən 75 faiz artaraq sutkada 60 min barelə çatıb. Bununla da Rusiya Suriyanın ən böyük xam neft tədarükçüsünə çevrilib.
Suriyanın enerji sektorundakı mənbə agentliyə bildirib ki, Dəməşq artıq yeni neft tədarükçüləri axtarır və yaxın vaxtlarda idxal strukturunda “radikal dəyişikliklər” gözləyir.
ABŞ Dövlət Departamenti isə bəyan edib ki, Vaşinqton Suriyanı ölkənin bərpası prosesində, ilk növbədə, Amerika şirkətləri də daxil olmaqla etibarlı beynəlxalq tərəfdaşlarla əməkdaşlığa çağırır. Eyni zamanda, Suriyanın Rusiyaya qarşı ABŞ sanksiyalarına riayət etməsi də gözlənilir.
Ağ Ev isə açıqlamasında Suriyanın terrorizmi dəstəkləyən dövlətlər siyahısından çıxarılması ilə Rusiyadan neft idxalının azaldılması arasında rəsmi əlaqənin olmadığını bildirib.
