“Newsweek” jurnalının 29 iyul buraxılışı ABŞ-ın keçmiş prezidenti Donald Trampın həbsxana forması geyinmiş və dəmir barmaqlıqlar arxasında əyləşmiş şəklini əks etdirən üz qabığı ilə çıxacaq.
Azpost.info xəbər verir ki, bu illüstrasiya “Tramp məhkum ediləcəkmi?” başlıqlı məqalədə yer alacaq.
Amerikalı jurnalist Devid Fridmanın məqaləsində Trampın niyə dəmir barmaqlıqlar arxasına düşməli olduğu arqumentləşdirilir. “Trampa qarşı irəli sürülən ittihamlar üzrə 20 ilə qədər həbs cəzası nəzərdə tutulur. Çox güman ki, mühakimə iki il və ya daha çox həbs cəzası ilə nəticələnəcək”, – müəllif yazır.
“New York Times”ın köşə yazarı Çarlz Blou isə bildirib ki, Tramp 2021-ci ilin yanvarında Kapitoliyə hücum olayları ilə bağlı mühakimə olunmasa, ABŞ-ın siyasi sistemi və ölkənin mövcudluğu təhlükə altında olacaq.
Qeyd edək ki, 2021-ci il yanvarın 6-da Trampın tərəfdarları Co Baydenin qalib gəldiyi prezident seçkilərinin nəticələrinin təsdiqlənməsini əngəlləmək üçün Konqresin binasına basqın etmişdi. Ötən dövr ərzində Nümayəndələr Palatasında yaradılan İstintaq Komitəsi iş üzrə yüzlərlə insanı dindirib.
Azpost.info
