Ukrayna
Ukraynada hüquq-mühafizə orqanları əcnəbilərin saxta nikah yolu ilə ölkədə qeyri-qanuni şəkildə yaşamaq cəhdinin qarşısını alıb. AzPost xəbər verir ki, Kiyev Şəhər Prokurorluğunun yaydığı rəsmi məlumata əsasən, bu qalmaqallı sxemdə iki Azərbaycan və iki Özbəkistan vətəndaşı iştirak edib.
İstintaq zamanı məlum olub ki, sözügedən əcnəbilər maddi vəziyyəti çətin olan ukraynalı qadınlara pul ödəyərək evləniblər. Saxta nikah müqabilində qadınlara təxminən 10 min qrivna təklif olunub. Sxemin təşkilatçısı isə hər əcnəbidən 1000-3000 ABŞ dolları arası məbləğ alıb.
Prokurorluğun məlumatına görə, bu üsulla saxta nikah bağlayan şəxslər Ukrayna ərazisində rəsmi yaşayış icazəsi əldə ediblər. Hüquq-mühafizə orqanları baş verənləri ciddi cinayət faktı kimi qiymətləndirib və dərhal əməliyyat tədbirlərinə başlayıb.
Rəsmi açıqlamada bildirilir ki, adıçəkilən dörd nəfər barəsində Ukrayna Cinayət Məcəlləsinin müvafiq maddələri ilə ittiham irəli sürülüb. Onlar dövlət sərhədini qanunsuz keçməyə təşkilatçılıq etməkdə və saxta nikah əlaqəsi yaratmaqda təqsirli bilinir.
Qanunvericiliyə görə, belə cinayət əməllərinə yol verən şəxsləri əmlak müsadirəsi, üç ilədək müəyyən vəzifələrdən məhrumetmə və 7 ildən 9 ilədək azadlıqdan məhrumetmə cəzası gözləyir.
Rəsmilər qeyd edir ki, bu kimi hallar son illər Ukraynada artmaqda davam edir və hüquq-mühafizə orqanları qanunsuz leqallaşma cəhdlərinə qarşı mübarizəni gücləndirib.
