Ukraynalı pranker Yevgeni Volnov (“Mayor Çernobayev”) Rusiya Müdafiə Nazirliyinin büdcə məsələlərinə həsr olunmuş qapalı müşavirəsinə qoşulduğunu iddia edib.
Azpost.info bildirir ki, onun sözlərinə görə, videokonfransda “Voentorg”, “Voentelekom”, “Oboronlogistika” şirkətlərinin nümayəndələri, eləcə də hərbi zavodların və təmir müəssisələrinin rəhbərləri iştirak ediblər.
Volnov bildirib ki, videokonfrans vasitəsilə toplantıda iştirak edən bütün məmurların şəxsiyyətini müəyyənləşdirmək və tədbirə cəlb olunan təşkilatlar barədə məlumat əldə etmək mümkün olub.
Onun sözlərinə görə, bundan sonra iştirakçılara Ukrayna dronlarının hərbi-sənaye kompleksinin istənilən obyektinə çata bildiyi bildirilib və yaxın gələcəkdə həmin obyektlərin hücuma məruz qala biləcəyi ilə bağlı xəbərdarlıq edilib.
Yayılan videoyazıdan görünür ki, Volnov söhbətə qoşulduqdan sonra Rusiya hərbi-sənaye kompleksi nümayəndələri videokonfransı başa çatdırmaq qərarına gəliblər.
Pranker tərəfindən yayılan iştirakçılar siyahısında hərbi daşımaları həyata keçirən dövlət aviaşirkəti “224-cü uçuş dəstəsi”nin, hərbi obyektləri elektrik enerjisi ilə təmin edən “Oboronenerqo”nun, Müdafiə Nazirliyinin əmlak kompleksini idarə edən “Qarnizon” holdinqinin, eləcə də Rusiya Müdafiə Nazirliyinin obyektlərinin idarə olunmasına cavabdeh “58 ÇPUO”nun nümayəndələrinin olduğu bildirilir.
Siyahıda həmçinin hərbi daşımalar, enerji təchizatı, rabitə, maddi-texniki təminat, silahların təmiri və Müdafiə Nazirliyinin obyektlərinin istismarı ilə məşğul olan digər müəssisələrin nümayəndələrinin də yer aldığı qeyd olunur.
Məlumatın digər mənbələr tərəfindən müstəqil şəkildə təsdiqlənib-təsdiqlənmədiyi açıqlanmayıb.
