G7 liderləri NATO-nun Vilnüs sammitindən sonra Ukrayna üçün təhlükəsizlik zəmanətlərini elan etməyə hazırlaşır.
Azpost.info xəbər verir ki, bu barədə “Bloomberg” mənbələrə istinadən yazır.
Agentliyin həmsöhbətlərinin sözlərinə görə, ABŞ və Alyansda iştirak edən digər ölkələr Kiyevi müasir hərbi texnika, o cümlədən hava hücumundan müdafiə sistemləri, artilleriya, uzaq mənzilli silahlar və zirehli texnika ilə təmin etmək üçün uzunmüddətli öhdəliklər götürməyə hazırdır.
Ukraynanın müttəfiqləri həmçinin Ukrayna silahlı qüvvələrinin və onun NATO-dakı müttəfiqlərinin operativ inteqrasiyasını asanlaşdıracaqlar.
Mənbələr “Bloomberg”ə bildiriblər ki, onlar ölkənin müdafiə sənayesinin inkişafını dəstəkləmək, onun qoşunlarına təlim keçmək, kəşfiyyat məlumatlarını bölüşmək və kibermüdafiəni gücləndirmək öhdəliyinə sadiqdirlər.
NATO-nun götürməyi planlaşdırdığı öhdəliklər Qərbin indiyə qədər etdiklərindən çox fərqlənmir. Bununla belə, təhlükəsizlik zəmanətləri çərçivəsində yardım genişləndirilə bilər. Eyni zamanda, təhlükəsizlik zəmanətlərinin bəyannaməsi hələ də müzakirə olunur, onun məzmunu dəyişə bilər.
Mənbələrdən birinə görə, G7 liderləri Rusiyanın yeni hücumları halında Ukrayna hakimiyyəti ilə addımları müzakirə etməyi vəd ediblər. Müttəfiqlər həmçinin Kiyevə təcili ehtiyaclar üçün maliyyə dəstəyi göstərməyə davam edəcək və hərbi əməliyyatlar başa çatdıqdan sonra ölkənin yenidən qurulmasına kömək edəcəklərinə bir daha söz verəcəklər.
Bundan başqa, G7 Rusiya Ukraynaya təzminat ödəyənə qədər Rusiyanın Qərbdəki aktivlərini dondurulmuş saxlamağa söz verəcək. Ukrayna da öz növbəsində hüquq-mühafizə, məhkəmə, iqtisadi, təhlükəsizlik və müdafiə sahələrində islahatları davam etdirmək öhdəliyi götürəcək.
Azpost.info
