Göz
Oftalmoloq, tibb elmləri namizədi Şahlo Mahkamova yay aylarında görmə qabiliyyətini pisləşdirən beş əsas təhlükəli vərdişi açıqlayıb. AzPost xəbər verir ki, onun sözlərinə görə, istirahət mövsümündə göz sağlamlığına diqqətsizlik sonradan ciddi oftalmoloji problemlərə yol aça bilər.
Birinci riskli vərdiş günəşə birbaşa, eynəksiz baxmaqdır. Gün ərzində artan ultrabənövşəyi (UV) radiasiya gözün tor qişasına, linzasına və görmə sinirlərinə zərər verə bilər. Bu isə katarakta və digər degenerativ xəstəliklərin yaranmasına zəmin yaradır.
İkinci təhlükəli vərdiş hovuz və ya açıq su hövzələrində kontakt linzalarla çimməkdir. Həkim qeyd edir ki, çirkli suda bakteriyalar və göbələklər linzalar vasitəsilə birbaşa gözə keçə bilər. Bu səbəbdən üzgüçülükdən sonra linzalar mütləq çıxarılmalı və birdəfəlik olanlar utilizasiya edilməlidir. Gözlər isə nəmləndirici damcılarla yuyulmalıdır.
Üçüncü zərərli faktor isə kondisioner istifadəsidir. Mahkamova bildirir ki, kondisionerlər havanı qurudur və əgər filtr sistemi vaxtında təmizlənmirsə, mikroblarla dolu hava gözün selikli qişasını qıcıqlandırır və quruluq sindromuna səbəb olur.
Dördüncü riskli davranış çirkli əllərlə gözə toxunmaqdır. Yayda açıq havada toz, qum və mikroblarla təmas daha çox olur və çirkli əllərlə gözə toxunmaq infeksiyaların yayılmasına səbəb ola bilər. Gözə yad cisim daxil olarsa, sadəcə qaynadılmış və soyudulmuş su ilə yumaq tövsiyə edilir, antibiotik və antiseptiklərin isə yalnız həkim təyinatı ilə istifadəsi məsləhətdir.
Beşinci və çox vaxt unudulan səbəb isə yuxu çatışmazlığıdır. Yayda uzun gündüzlər və artan aktivlik istirahətin azalmasına səbəb olur ki, bu da həm görmə sinirlərini, həm də ümumi beyin fəaliyyətini zəiflədir.
Mütəxəssis yay aylarında göz sağlamlığını qorumaq üçün keyfiyyətli yuxu, qoruyucu eynəklər, gigiyena və düzgün nəmləndirmənin vacib olduğunu vurğulayır.
