1961-ci il aprelin 12-də bəşər tarixində yeni dövr başlandı. Sovet kosmonavtı Yuri Qaqarin kosmosa uçan ilk insan kimi dünya tarixinə adını yazdırdı. Bu tarixi uğurdan sonra SSRİ rəhbərliyi onun şərəfinə Kremldə möhtəşəm qəbul təşkil etdi.
Azpost.info-nun “Fotoxronika” layihəsində təqdim etdiyi növbəti tarixi foto həmin qəbul zamanı çəkilib. Fotoda dünyanın ilk kosmonavtı Yuri Qaqarin Rusiya Pravoslav Kilsəsinin rəhbəri – Patriarx I Aleksi ilə görüşür.
Lakin mərasim zamanı baş verən hadisə həmin dövrün sovet cəmiyyəti üçün gözlənilməz olub.
Məlumata görə, Sovet İttifaqının rəhbəri Nikita Xruşşovun təşkil etdiyi rəsmi qəbulda dövlətin sərt ateizm siyasəti fonunda gözlənilməz bir səhnə yaşanıb. Qəfil bir qadın Patriarx I Aleksi-yə yaxınlaşaraq onun qarşısında diz çöküb və xeyir-dua istəyib.
Bu addım tədbirdə iştirak edənləri təəccübləndirib. Çünki həmin illərdə dini ayinlərin açıq şəkildə nümayiş etdirilməsi hakim ideologiyaya uyğun sayılmırdı.
Sonradan məlum olub ki, Patriarxın qarşısında diz çökən qadın heç də təsadüfi qonaq deyilmiş. O, həmin gün bayram qəbuluna dəvət olunmuş Yuri Qaqarinin anası Anna Timofeyevna Qaqarina idi.
Bu hadisə göstərirdi ki, Sovet dövlətinin rəsmi ateizm siyasətinə baxmayaraq, milyonlarla insan dini inanclarını ailə ənənəsi kimi qoruyub saxlayırdı. Qaqarinin anasının bu davranışı həm həmin dövrün ideoloji ziddiyyətlərini, həm də sovet insanının şəxsi inancı ilə dövlət siyasəti arasındakı fərqi əks etdirən maraqlı tarixi epizodlardan biri kimi yadda qalıb.
Bu gün həmin foto təkcə kosmosun fəthini deyil, həm də SSRİ tarixinin az tanınan və düşündürücü məqamlarından birini əks etdirən qiymətli sənəd hesab olunur.
