Hərbi ekspert Ədalət Verdiyev Abşeron rayonunun Hökməli və Qobu qəsəbələrində avtomobil yollarının əsaslı təmiri ilə bağlı vəziyyəti tənqid edib.
AzPost xəbər verir ki, ekspert sosial şəbəkədə paylaşımında Prezident İlham Əliyevin 19 dekabr 2025-ci il tarixli sərəncamı ilə Hökməli və Qobu qəsəbələrində yolların əsaslı təmiri üçün Azərbaycan Avtomobil Yolları Dövlət Agentliyinə ilkin olaraq 1,4 milyon manat vəsait ayrıldığını xatırladıb.
Onun sözlərinə görə, sərəncamın imzalanmasından 8 ay keçməsinə baxmayaraq, ərazidə təmir işlərinə başlanılmayıb.
Ədalət Verdiyev bildirib ki, sözügedən yol bir neçə il əvvəl əsaslı təmir edilsə də, yağış sularının və kanalizasiya sisteminin olmaması, eləcə də ətrafdakı ev və obyektlərdən çirkab sularının yolun üzərinə axıdılması səbəbindən qısa müddətdə yararsız vəziyyətə düşüb.
Ekspert qeyd edib ki, buna baxmayaraq, yol texniki nəzarətçilər tərəfindən istismara qəbul edilib. Onun sözlərinə görə, hazırda həm “Araz” market, həm də “Megastore” istiqamətindən çirkab suları yolun üzərinə axır və bunun qarşısını alan yoxdur.
Ədalət Verdiyev Hökməli qəsəbəsinin uzun illərdir infrastruktur problemləri ilə üz-üzə qaldığını da vurğulayıb. “Hökməli ən geridə qalmış kəndlərdən biridir. Burada normal su təchizatı, yollar, marşrut xətləri, park və istirahət məkanları yoxdur. Son 15 ildə bələdiyyə tərəfindən cəmi bir zibil meydançası tikilib. Kəndin daxili yolları da bərbad vəziyyətdədir. Ceyranbatanı gözlə görürük, amma onun suyundan istifadə edə bilmirik”, – deyə o bildirib.
Ekspert əlavə edib ki, kənd sakinləri bu problemlərlə bağlı mütəmadi olaraq ona müraciət edirlər. O, məsələ ilə bağlı aidiyyəti qurumlardan və ərazinin deputatından cavab ala bilmədiyini, buna görə də problemi ictimaiyyətin diqqətinə çatdırmağa məcbur olduğunu qeyd edib.
Paylaşımını “Hökməli hamının yadından çıxıb” sözləri ilə yekunlaşdıran Ədalət Verdiyev qəsəbədəki problemlərin həlli üçün aidiyyəti qurumları tədbir görməyə çağırıb.
