“Düzgün qidalanma dedikdə, dəmirlə zəngin qida rasionu nəzərdə tutulur”.
Ölkə.Az xəbər verir ki, bu sözləri həkim-hematoloq Şəhla Şabanova deyib.
Onun sözlərinə görə, əsasən, qırmızı ət, yumurta, quru meyvələr, yarpağı tünd olan tərəvəzlər (çuğundur, pazı), orqanik meyvələr, tut bəhməzi, qarabaşaq dəmirlə zəngin hesab olunur: “Eyni zamanda, mövsümi meyvə-tərəvəzlər dəmirlə zəngin olsa da, birtərəfli bitki mənşəli qidalanmada yenə də qan azlığı yarada bilər. Bu səbəbdən, həm meyvə-tərəvəz, həm də ət məhsullarından istifadə edilməlidir”.
Ş.Şabanova vurğulayıb ki, orqanizmdə dəmirin miqdarında azalma, dəmir itkisi və ya qida vasitəsilə qəbulunun azalması nəticəsində qan azlığı ola bilər: “Qan azlığı zamanı erkən yorulma, təngnəfəslik, halsızlıq, başgicəllənmə, ətrafların soyuq olması, ürək döyüntüsünün artması, saçların qırılaraq tökülməsi, ağız bucaqlarında çatların yaranması və digər şikayətlər müşahidə edilə bilər”.
