Diş həkimi
Rusiyanın Krasnoyarsk vilayətində diş həkimi yeddi yaşlı uşağın ölümündə ittiham olunur. AzPost MK-ya istinadla xəbər verir ki, Krasnoyarsk diyarı və Xakasiya üzrə İstintaq Komitəsinin verdiyi məlumata görə, anestezioloq-reanimatoloq, özəl tibb mərkəzində yeddi yaşlı uşağın ölümünə səbəb olan səhlənkarlıqda ittiham olunub.
2024-cü il iyunun 12-də Bolşemurtinski rayonundan olan valideynlər və onların övladı stomatoloqunun qəbuluna gəliblər. Diş müalicəsi valideyinlərin istəyi ilə narkoz altında aparılmalı idi. Anesteziya tətbiq edildikdən sonra körpənin vəziyyəti pisləşib və təcili yardım gələnə qədər vəfat edib.
İstintaq Komitəsinin məlumatına görə, diş həkimi uşağın əvvəllər traxeostomiya əməliyyatı keçirdiyini və onun fizioloji patologiyalarının olduğunu bilib. Məhkəmə-tibbi ekspertizanın rəyinə görə, oğlan kəskin tənəffüs çatışmazlığından dünyasını dəyişib. İstintaq orqanları həkimə qarşı vəzifəsini lazımınca yerinə yetirmədiyinə görə ehtiyatsızlıqdan ölümə səbəb olma maddəsi ilə ittiham irəli sürüb.
Hazırda cinayət işi üzrə istintaq son mərhələdədir.
