Şri-Lanka polisi məmurun ölümü ilə bağlı məhkəmənin həbs qərarından sonra qaçan polis rəisini tapmaq üçün bu gün ictimaiyyətə müraciət edib.
Lent.az xarici KİV-ə istinadla bildirir ki, polis sözçüsü Buddhika Manatunqa, bir neçə xüsusi bölmənin axtarışlarına baxmayaraq, Polis Baş Müfəttişi (IGP) Deşabandu Tennakunu tapa bilmədiklərini söyləyib.
“Biz ictimaiyyəti onun harada olduğu barədə hər hansı məlumat verməyə çağırırıq. Həmçinin xəbərdarlıq edirik ki, polis rəisini gizlədən şəxs mühakimə olunacaq” deyə, Manatunqa jurnalistlərə bildirib.
Manatunqa etiraf edib ki, öz rəislərini tapmamaq “ictimaiyyətin polisin gücünə inamını sarsıdıb”.
Məhkəmədən qaçan polis rəisinə ölkədən çıxış qadağası qoyulub.
“Bu, ciddi məsələdir və biz onu həbs etmək üçün daha çox səylə çalışırıq. Qanundan xəbərdar olan biri kimi, IGP məhkəmə qərarına əməl etməli və təslim olmalı idi” deyə Manatunqa qeyd edib.
Qeyd edək ki, hakim, 2023-cü ildə bir otelə qanunsuz basqın etməyə icazə verdiyinə dair iddialardan sonra keçən həftə Tennakunun həbsinə qərar verib.
Tennakun Kolombodakı bir polis bölməsinə paytaxtdan təxminən 150 kilometr aralıda, cənub sahilindəki Veliqama kurort şəhərindəki oteldə qanunsuz narkotik axtarışı üçün əmr vermişdi.
Gizli əməliyyatdan xəbərsiz olan yerli polislə əməliyyata gələn bölmə arasında qarşıdurma yaranıb. Nəticədə bir zabit ölüb, digəri isə ağır yaralanıb. Lakin heç bir narkotik tapılmayıb.
