Süni intellektdə yeni dövr: “Microsoft” insan beyni əsaslı AI inkişaf etdirir

“Microsoft” və İsveçrənin “İnait” startapı məməli beyninin məntiqi düşünmə qabiliyyətlərini süni intellektə (AI) inteqrasiya edərək, robototexnikadan maliyyə ticarətinə qədər bir çox sahədə yeni bir dövr başlatmağı hədəfləyir.

“Microsoft” İsveçrədə yerləşən “İnait” şirkəti ilə əməkdaşlıq edərək süni intellekt sahəsində yeni bir dövrün qapılarını açır. Bu tərəfdaşlıq insan və digər məməlilərin beyninin məntiqi düşünmə gücünü təqlid edən AI modeli yaratmaq məqsədi daşıyır. Robototexnika və maliyyə ticarəti də daxil olmaqla geniş bir spektrdə inqilabi dəyişikliklər vəd edən bu təşəbbüs, süni intellektin sərhədlərini yenidən müəyyən edə bilər.

“Microsoft” bildirir ki, bu inqilabi layihənin əsasında 20 ildən çox aparılan nevroelm araşdırmaları dayanır. Məqsəd bioloji zəkanı təqlid edərək süni intellektin imkanlarını daha yüksək səviyyəyə qaldırmaqdır. “Financial Times”ın məlumatına görə, “İnait”in həmtəsisçilərindən Henri Markram siçan beyninin bioloji cəhətdən real modellərini yaratmaq üçün 18 milyon sətrdən ibarət bir kompüter kodu işləyib hazırlayıb. Bu tədqiqatlar insan beyninin quruluşu və funksiyalarından ilhamlanaraq həyata keçirilib.

Süni intellekt sistemlərinin öyrənmə və qərarvermə proseslərini inkişaf etdirmək üçün beynin neyronlar vasitəsilə məlumat emal etmə üsulunu təqlid edən yeni sinir şəbəkəsi texnologiyası yaradılıb. Beyin məlumatları birləşmiş neyron əlaqələri ilə emal etdiyi kimi, bu sinir şəbəkələri də mürəkkəb problemləri həll etmə qabiliyyətinə malik olacaq.

“İnait”in baş direktoru Riçard Frey bildirir ki, bu layihə 2018-ci ildə beynin iş prinsiplərini dərk etməyə əsaslanan və indiyə qədər görünməmiş bir süni intellekt növü yaratmaq məqsədi ilə qurulub. “Microsoft”un EMEA (Avropa, Yaxın Şərq və Afrika) bulud və süni intellekt üzrə rəhbəri Adir Ron isə bu texnologiyanın ənənəvi məlumat əsaslı modellərin məhdudiyyətlərini aşaraq, real idrak (kognisiya) səviyyəsinə çata bilən rəqəmsal beyinlərə doğru irəlilədiyini vurğulayır. Bu yanaşma, süni intellekt sahəsində tamamilə yeni bir paradiqma deməkdir.

“Microsoft” və “İnait” tərəfindən inkişaf etdirilən memeli beyni əsaslı AI modeli süni intellekt sahəsində inqilabi dəyişikliklər yarada bilər. Bu texnologiya “Microsoft”un bu məhsullarına inteqrasiya edilərək bir çox sektorda yenilikçi həllər təqdim edəcək:

Maliyyə ticarəti: Yeni AI modeli ticarət alqoritmlərini optimallaşdırmaq, risk idarəetmə vasitələrini təkmilləşdirmək və fərdiləşdirilmiş məsləhət xidmətləri təqdim etmək üçün istifadə ediləcək.

Robototexnika: Sənaye istehsalında daha çoxfunksiyalı və inkişaf etmiş robotların yaradılması hədəflənir.

Koqnitiv texnologiyalar: Real idrak qabiliyyətinə yaxın süni intellekt sistemlərinin yaradılması, daha mürəkkəb problemlərin həlli üçün yeni imkanlar aça bilər.

“Microsoft” və “İnait” tərəfindən həyata keçirilən bu əməkdaşlıq, süni intellektin inkişafında tarixi bir addım ola bilər. Məməli beynindən ilhamlanan bu model təkcə texnologiyanı daha ağıllı etməklə kifayətlənməyəcək, həm də insan beyninin necə işlədiyini daha yaxşı anlamağa kömək edəcək.

Mənbə: Qaynarinfo.az