Rusiya cəmiyyəti Ukraynadakı münaqişəyə son qoyulmasına hazırdır.
AzPost bildirir ki, bu barədə Qərb mediası “FilterLabs” analitik şirkətinin sosial şəbəkələrin təhlilinə istinadən məlumat yayıb. Şirkət müharibə başlayandan bəri Ukraynada baş verənlərlə bağlı Rusiyada ictimai rəydə baş verən dəyişiklikləri öyrənib.
Moskva və Sankt-Peterburqda, eləcə də Ukrayna ilə həmsərhəd bölgələrdə sosial şəbəkələrdəki yazıları təhlil edilib. Tapıntılar atəşkəs razılaşmasına geniş skeptisizm və ölkədəki ümumi müharibə yorğunluğunu göstərir.
“Ukrayna və Rusiya ilə bağlı hər şeydə mənzərə mürəkkəbdir. Baxmayaraq ki, sərhədyanı ərazilərdə və böyük şəhərlərdə bir ümumi xətt var – ruslar hesab edirlər ki, müharibəyə son qoymağın vaxtı çatıb, amma Rusiyanın şərtləri ilə”
Rusiya ictimaiyyəti ABŞ-ın Ukraynaya kəşfiyyat məlumatlarının mübadiləsini və silah tədarükünü bərpa etməsi xəbərini mənfi qarşılayıb. Əgər bir ay əvvəl Rusiyada Donald Trampa münasibət yaxşılaşırdısa, indi şərhçilər daha çox şübhə ilə yanaşırlar.
“Rusiyada çoxları Trampın sülh təkliflərini Amerika və Qərbin Rusiyadan öz maraqları üçün istifadə etməsinin başqa bir yolu kimi görür” – FilterLabs-ın baş direktoru Conatan Teibner bildirib.
