“Suriyada qalan vətəndaşlarımızın qaytarılması üçün müxtəlif vaxtlarda Nazirlər Kabinetinə, həmçinin digər səlahiyyətli dövlət qurumlarına tərəfimdən müraciətlər edilib”.
AzPost bildirir ki, bu sözləri Azərbaycanın İnsan Hüquqları üzrə Müvəkkili (Ombudsman) Səbinə Əliyeva “Report”a müsahibəsində bildirib.
Onun sözlərinə görə, Ombudsman və onun nümayəndələri tərəfindən Suriya Ərəb Respublikasından repatriasiya edilmiş Azərbaycan vətəndaşlarından 57-si uşaq, 17-si qadın olmaqla 74 nəfərlə görüş keçirilib, onların hüquqlarının təmini vəziyyəti öyrənilib.
“2024-cü ildə də bu istiqamətdə fəaliyyət davam edib, ölkəyə gətirilmiş 31 repatriantla görüşlər keçirilib, onların yerləşdirildikləri müəssisədə həyata keçirilmiş reabilitasiya tədbirləri barədə məlumatlar əldə edilib, hüquqlarının müdafiəsi istiqamətində zəruri tədbirlər görülüb. Bu görüşlər zamanı onların ümumi və psixoloji durumu qiymətləndirilib, problemləri və ehtiyacları öyrənilib, repatriantlara Ombudsmanın fəaliyyəti, ona müraciət imkanları barədə məlumat verilib”-deyə S. Əliyeva bildirib.
